DILI, STLTIMORLESTE.com – Kondenadu Lito Bom Madeira hetan liberdade kondisional husi tribunal, tanba kumpri ona nia kastigu iha prizaun metade de pena.
Iha sala julgamentu laran, iha prosesu audisaun ba kondenadu nee, Juiz prosesu Ana Paula husu ba kondenadu hakarak sai husi prizaun ka lae, kondenadu deklara, kondenadu hakarak fila ba hamutuk ho familia.
Kondenadu deklara, durante iha prizaun kondenadu aprende kona-ba halo kadeira, tuir formasaun kona-ba kontrola hirus, formasaun kona-ba labele aprende foti ema nia sasan.
Kondenadu deklara, arepende tebes ho hahalok neebe halo antes nee, no promete sai husi prizaun sei la halo tan hahalok nee. Kondenadu dehan, sai husi prizaun sei husu osan ba iha nia bin hodi fila liman buka moris, atu devolve hikas fali vitima nia osan neebe kondenadu foti.
Rona tiha kondenadu nia deklarasaun sira nee, Juiz prosesu Ana Paula deside hasai mandadu libertasaun ba kondenadu, maibe tribunal mos fo garantia ba kondenadu durante fulan 6 nia laran, tenke aprezenta aan iha tribunal hodi devolve hikas osan vitima nian, depois mak kondenadu foin hetan liberdade total.
Tuir Defeza Marsal Mascarinhas katak, kondenadu hetan liberdade tanba kumpri ona metade de pena.
“Nia hetan ona liberdade kondisional tanba nia prienxe ona metade de pena, nia mos tama iha kadeia aprende buat barak, no promete sei la halo tan hahalok nee, no sei buka osan hodi selu indemnizasaun US$ 300 ba vitima neebe mak nia foti nia osan,” dehan defeza nee ba STL iha Kaikoli, Sesta (17/01/2025).
Defeza nee hatete, iha desizaun Tribunal nian kondena kondenadu ba prizaun ho tinan 5 ba krime furtu, no kondenadu kumpri ona tinan 2 resin tuir regra prienxe ona rekezitus hodi hetan metade de pena.
Nia sublina tan, kondenadu tama prizaun iha 2022 fulan Agostu, no hetan liberdade kondisional iha loron 17 Janeiru 2025.
Iha sala julgamentu, kondenadu mos promete sai la halo tan aktu ida nee iha liur, hanesan foti ema nia sasan.
(ter)