DILI, STLTIMORLESTE.com – Relasiona ho udan boot iha Munísipiu Ermera, halo kondisaun estrada no rai kois, nunee iha loron Kuarta kalan (08/04/2026) porvolta 08:00 bá tuku 09:00 hanesan nee, bainhira Amu Vigário Hatolia, Pe. Hélio Nunes halo viajen husi Gleno atu bá Hatulia, too Mertutu area Railore hetan asidente kareta monu ka baku fila, maibe Amu nia kondisaun agora diak hela.
Tuir Diretor Sentru Saude Ermera, Antonio de Deus Fatima katak, Amu ho kareta monu porvolta tuku 08:00 bá 09:00 kalan hanesan nee husi Gleno atu bá fali Hatulia, too Mertutu area Railore nian tanba rai kois, nee mak Amu ho kareta monu, maibe Padre nia kondisaun diak hela, kareta mak la aporveita. Sarani sira iha fatin nee atu lori Amu mai hospital, maibe Amu dehan diak hela.
“Hodi kalan sarani sira husi Koliati nian mak akompanha lori fali bá Hatulia, sira atu lori mai hospital maibe Amu dehan diak hela. Neebe Amu la konsege mai hospital, no ohin dader halo fali ona misa iha Igreja Hatulia,” dehan nia bá STL liu husi telefone, Kinta (09/04/2026).
Nia hatutan, kondisaun dalan mak kois, tanba hodi bainrua iha nee udan makaas, neebe halo estrada no rai kois, pior liu iha fatin ida Amu monu bá nee kois los. Asidente nee Amu mesak deit ho kareta, nia nain rasik mak lori kareta, maibe agradese tanba kondisaun Pe. Helio nian diak hela.
(dom)
