DILI, STLTIMORLESTE.com – Tuir Xefe Suku Bekora Interinu, Luis do Carmo da Soares hatete, komunidade Bekora iha konsiensia hodi sobu rasik nia uma hafoin hetan eviksaun husi Governu.
“Durante loron 11 Janeiru ekipa husi Ministeriu Obras Publika (MOP), SEATOU no Terras Proriedade mai enkontru ho komunidade kona-ba alargamentu estrada, husi nee ami nia komunidade iha konsiensia rasik hodi sobu sira nia hela fatin, tanba sira mos hakarak kontribui ba dezenvolvimentu ida nee,” hatete Luis ba STL iha nia knaar fatin Sede Suku Bekora, Sesta nee (21/02/2025).
Nia dehan, antes nee MOP rasik marka ona fatin sira nee katak tenke dook husi estrada 19,50 metru, maibe too horiseik rona fali informasaun katak, muda ba 23,60 metru, maibe sira nafatin halo despeju administrativu.
“Horiseik ekipa MOP sira mai dehan fali tenke muda ba 23,60 metru no sira dehan nafatin halo despeju administrativu ba sira, maibe ami sei fo fali sensibilizasaun ba komunidade sira, nunee sira bele hatene informasaun sira nee, nunee too tempu sira la bele hakfodak,” nia esplika.
Nia informa, komunidade Bekora neebe afetadu ba alargamentu estrada hamutuk 170 maioria rental, benkel no loja xineza nian.
“Atu hateten deit alargamentu nee fo ona uma hamutuk 170 maioria rental, benkel no loja xineza sira neebe mak besik liu estrada inklui ho moru husi madre sira nian,” nia deklara.
Iha fatin hanesan, Komunidade Suku Bekora Florencio da Costa esplika, nuudar komunidade neebe afetadu ba alargamentu estrada Iha Suku Bekora, Postu Administrativu Kristi Rei, Munisipíu Dili sente triste, tanba lakon hela fatin, maibe tenke kontribui mos ba dezenvolvimentu, maibe Ministeriu Obras Publiku nia desizaun nee la klaru mai ninia sidadaun sira.
“MOP mai sukat husi estrada mai ami nia uma tenke fo espasu nee iha 19,50 metru, maibe ohin MOP mai fali laos 19,50 metru, maibe tenke sukat husi estrada ba hau nia uma 23,60 metru,” nia koalia.
Nia afirma, desizaun neebe implementa lá forte, tanba alargamentu nee dook husi 19,50 metru laos 23,60 metru.
“Hau la simu, tanba ami sobu rahun ona too mai iha marka ka anak pana neebe sira tau ba nee, entaun ami hadia ona no hada tan batako, maibe ohin mai dehan laos 19,50 metru, maibe 23,60 metru,” nia afirma.
Entretantu dadus neebe STL asesu iha Suku Bekora iha aldeia 10, husi 10 nee aldeia hitu mak hetan alargamentu estrada no tolu mak lae. Aldeia hitu mak Aldeia Au-Hun, Becusse-Sentru Becusse-kraik Caqueo-Laran, Klac-Fuik, Maukoko-Mate, no Mota Ulun, nomos aldeia tolu neebe mak la kona afetadu mak aldeia Berebido, Darlau no Romit, total uma kain husi suku Bekora hamutuk 5.109.
(jen)
