DILI, STLTIMORLESTE.com —Timor-Leste (TL) agora iha kooperativa 277, membru besik 42,000, ho partisipasaun feto dominante no lideransa ne’ebé susesu.
Sekretáriu Estadu Kooperativa (SEKoop), Arsénio Pereira da Silva hatete, numeru kooperativa iha Timor-Leste aumenta ba 277, depois instituisaun ne’e fó pose ba kooperativa foun tolu, rua iha Baucau no ida iha Dili.
Liafuan ne’e Arsénio ba jornalista sira iha Correios Mascarenhas, Dili, iha Kinta (27/08/2026).
Ho aumentu kooperativa foun sira, Timor-Leste agora iha federasaun 15 no konfederasaun ida.
Arsénio hatete, kooperativa 277 ne’e envolve membru besik 42,000, kompostu husi feto no mane, ema ho defisiénsia, juventude, ferik-katuas, inklui funsionáriu públiku no membru Polísia.
Nia hatete katak, iha instituisaun estadu barak, funsionáriu sira mos komesa hakarak estabelese kooperativa rasik atu bele dezenvolve atividade ekonomia no la depende deit ba parte seluk.
SEKoop rasik mos estabelese kooperativa ba funsionáriu sira, ne’ebé foin dadaun simu pose. Objetivu mak atu funsionáriu sira kompriende diretamente oinsá kooperativa funsiona no bele dezenvolve atividade ekonomia hamutuk.
Arsénio afirma katak, husi kooperativa sira ne’ebé eziste, balun hatudu ona rezultadu diak, liuliu iha kresimentu kapital.
“Kooperativa balun nia kapital to’o US$3 miliaun no US$4 miliaun. Maibé rata-rata kapital sira iha besik US$5,000 ba leten, no minimu mak US$.1,500,” dehan Arsénio.
Nia hatutan katak kooperativa foun balun hahú ho kapital besik US$450, maibé sira ne’ebé hala’o atividade durante tinan ida ka rua, normalmente kapital aumenta ba liu US$ 1,000.
Arsénio subliña katak partisipasaun feto iha kooperativa sira aas, no kooperativa ne’ebé lidera husi feto barak hatudu rezultadu diak.
Nia fó ezemplu kooperativa iha Maliana no Aileu, inklui Laramona Maliana, ne’ebé agora iha sukursal iha Dili, Aileu no Ermera.
Nia mos temi kooperativa ida iha Laleia ne’ebé membru hotu-hotu feto. Kooperativa ne’e agora iha kapital besik US$50,000, depois hahú ho osan US$ 300.
Tuir Arsénio, grupu ki’ik ne’e transforma sai kooperativa depois SEKoop fó fasilitasaun no apoiu ba prosesu dezenvolvimentu.
(dom)
