DILI, STLTIMORLESTE.com – Haree ba Timor Leste iha potensialidade boot ba produtu oin-oin, hanesan kafe, hudi, fehuk, aifarina, ikan no seluk tan, tanba nee presiza loke industria, nunee haree no moderniza ba produtu Timor Leete nian.
Deputadu Bankada KHUNTO, Antonio Verdial hatete, presiza kria industria balu iha Timor Leste, hodi haree ba produtu neebe mak Timor Leste iha.
“Ho produtu neebe ita iha née ita bele halo sai ba buat oin-oin hanesan dose ka krupuk ruma, nunee ita bele faan iha rai laran bele mos esporta, maibe atu harii industria nee depende ba Governu nia planu oinsa atu organiza hodi halao produsaun ruma iha rai laran”, hatete Deputadu Antonio Verdial ba STL iha PN, Segunda (20/01/2025).
Nia dehan, sa tan agora Timoroan barak mak iha esperiensia servisu iha rai liur, hanesan Korea du Sul, Inglatera, Australia no seluk tan, atu sira nia kontratu hotu lori sira envolve aan iha industria nee, bele implementa sira nia esperiensia neebe iha.
Tuir nia, karik Timoroan balu neebe mak servisu iha ema nia rai fila mai la presiza hein Governu, maibe loke daudaun ona maske kiik, maibe hahu uluk pois governu bele tau matan.
Tanba nee, inisiativa joven idak-idak tenke halao uluk mak governu apoia. Tanba ema dehan kreatividade no inovasaun importante atu bele muda buat ruma.
(gui)
