DILI, STLTIMORLESTE.com – Konselhu Imprensa nuudar Orgaun regulador tenke haree kriteria neebe rigorozu, hodi kontrola ba instituisaun komunikasaun sosial no define lo-loos ida neebe mak media komunikasaun no ida neebe mak media sosial.
Kestaun nee hatoo husi CEO Media Suara Timor Lorosae (STL), Salvador Januario Ximenes Soares liu husi nia aprezentasaun, bainhira halao enkontru ho Prezidente Konselhu Imprensa ho Ekipa, iha knua STL, Surikmas, Dili, Tersa (04/02/2025).
CEO STL dehan, harii media tenke moris ho espiritu ida katak haklake lia loos no indepedente duni, laos lori misaun grupu ida nia ka ema ida nian atu ba halao knaar jornalizmu.
“Ita tenke halo kriteria ba media ka loke media nee rigorozu, nee tenke rigorozu se mak media, se mak instituisaun komunikasaun sosial nee ita tenke rigorozu hodi determina no define, dala ruma nee hotu-hotu mai protesta, maibe tenke halo sikap ida tegas, laos loke media rihun rahun terbit iha neebe halo nusa la hatene tinan bailoron ita hanesan nee hela deit nee susar, too eleisaun ona mosu mai barak loos oin-oin, hotu-hotu reklama nia direitu ami mos iha direitu hili ba KI, maibe loron-loron la hatene nia halo notisia hira fulan ida halo notisia hira la hatene, buat sira nee lo-loos iha kriteria para los, se Konselhu Imprensa la tertipkan ida nee hau laiha harap boot ba media,” katak CEO STL.
CEO STL nee hatutan, bainhira harii media tenke iha domin ba profisaun no harii media tenke haree didiak nia kriteria hotu-hotu, tanba oras nee daudaun ema hotu loke media maibe mai ho kriteria neebe la klaru, tanba nee KI presiza halo sosializasaun klaru ba media neebe rejistu sira iha fatin ka lae? Publikasaun nee husi website ka lae, presiza haree didiak, prienxe kriteria hotu ka lae.
“KI too agora seidauk define kriteriu neebe rigorozu, katak rekonhesimentu atu sai ba media nee oinsa, pelumenus hau aseita lo-loos bele kaer ida foin daudaun Prezidente Republika fo rekonhesimentu ba kontrbuisaun ba media sira nia kontrubuisaun ba publikasaun vizita Amu Papa nia nee pelumenus bele foti husi nee bele lao,” dehan CEO STL nee.
Hatan ba kestaun nee, Prezidente Konselhu Imprensa, Otelio Ote hatete, loos duni oras nee iha hela preparasaun atu halo reverifikasaun ba media sira no plenariu semana rua liu ba deside atu husu ekipa hodi halo verifikasaun, maibe molok halo ba media, KI sei halo uluk regulamentu ida kona-ba reverifikasaun. Nunee bele identifika ida neebe mak tama kategoria media komunikasaun sosial lo-loos, ida neebe mak media sosial.
Nunee mos Diretor Diresaun Relasaun Institusional no Informasaun (DRJT), Altino da Cruz Freitas hatutan, liga ho rekomendasaun husi CEO STL, ida nee diak, oinsa mak hodi haree postura media iha Timor Leste.
Maibe atu halo indetifikasaun ba media, oras nee KI halo asina akordu ho Server iha semana nee, nunee bainhira fo lisensa ba media sira mos husu lai notifikasaun ruma husi KI katak, media nee bele hetan duni lisensa negosiu bele ka lae, prienxe ona rekezitu nuudar media ka lae, foin bele loke media.
(eme)