DILI, STLTIMORLESTE.com – Kuadru, militante no simpatizante husi Partidu Frente Revolusionariu Timor Leste Independente (FRETILIN) simu hikas maktoban Antigu Prezidente Republika no atual Prezidente Partidu FRETILIN, saudozu Francisco Guterres Lu Olo, ho matan-been no lelir lian iha sede Comite Central FRETILIN (CCF), Comoro, Dili.
Prosesaun tula maktoban saudozu nian neebe sai husi uma moris iha Bairru Farol too iha CCF, simu kedan ho hakoak, tanis no lelir naruk husi responsavel, baze partidu nian, no mos povu neebe hein dezde dader deit. Ambitu iha sede laran nakonu ho laran triste neebe klean nuudar omenajen ikus ba lider asuwain ida neebe dedika nia moris tomak ba luta libertasaun nasional no dezenvolvimentu Estadu.
Iha fatin hanesan, Sekretariu Jeral Partidu FRETILIN, Mari Akatiri hamutuk ho estrutura altu partidu nian no mos membru Komite Sentral marka prezensa hodi fo onra ikus ba belun luta nian. Prezensa lideransa nasional nee hatudu solidariedade no laran sadia neebe klean tebes hosi família boot FRETILIN nian ba lakon boot ida nee.
Estrutura partidu nian rekonhese no fo sasin katak saudozu Francisco Guterres Lu Olo nuudar figura birlhante neebe hatudu integridade, kbiit lideransa no domin boot ba rai moris. Nia laos deit nuudar lider partidu nian neebe kaer metin prinsipiu organizasaun, maibe mos nuudar estadista boot ida neebe sai saseluk ba unidade nasional iha Timor Leste.
Hafoin tiha serimonia iha CCF, maktoban saudozu nian entrega ba FALINTIL- Forsa Defeza Timor Leste (F-FDTL) hodi lao tuir protokolu funebre nasional.Prosesaun nee kontinua kedan ba Palasiu Prezidensial Bairru Pite hodi simu omenajen estadu nian husi titular sira, antes tula fali ba Katedral hodi rona misa funebre neebe prezide husi Amu Bispu sira. Hafoin misa remata, korpu saudozu nian lori mos ba Parlamentu Nasional hodi simu ondra ikus husi Deputadu sira nuudar eis titular Orgaun Soberania nian.
No ikus liu, maktoban saudozu Francisco Guterres Lu Olo tula lori ba fatin hakoi ikus iha jardim Eroi Metinaro. Serimonia funebre nasional nee halao tuir ajenda ofisial neebe Governu no Estadu organiza ona, ho onra militar tomak hodi fo respeitu neebe aas ba legadu boot neebe nia husik hela ba nasaun no povu ida nee.
Iha biban solene nee Sekretariu Jeral Partidu FRETILIN, Mari Alkatiri liu husi minutu de silensiu hodi fo sai katak kestaun familia ba enlutada, mana Cidalia no subrinha no subrinhu nain 4, hamutuk ho familia enlutada FRETILIN nian sai nuudar prograna uluk. Nia hateten katak nia mai fatin Santu nee dala barak ona hodi kolia ba herois sira neebe hamutuk ona maibe hadook an husi moris fiziku.
Iha fatin neeba Alkatiri mos husu permisaun ba Kamarada Prezidente Lu Olo hodi kolia iha biban espesial ida,no husu tempu hodi hatoo lia fuan importante hodi husu minutu ida de silensiu.
Nia sublina katak, povu tomak hakmatek tiha ona loron ba loron nuudar dalan karidade nian, no hatudu sasin katak siensias esperansa nian sei hanutuk, maski fiziku kamarada Lu Olo nian dook ona husi moris.
(car)
