BAUKAU, STLTIMORLESTE.com – Prezidente Konselhu Munisipal Kombatentes Libertasaun Nasional (CMCLN – sigla português) Baukau, Cornelio Gama “L7” husu veteranus sira kuidadu saude liu husi hakbesik aan ba fasilidade saude sira, bainhira infrenta kondisaun saude la estavel.
Komadante FALINTIL Cornelio Gama “L7” rekonhese, veteranus nuudar patrimoniu estadu, tanba durante luta libertasaun nasional durante tinan naruk iha ai laran hasoru invazor Indonezia, veteranus sakrifika aan liu husi fo aan ba mate hasoru inimigu iha tempu difisil nia laran, maibe preokupa ho veteranus sira nia saude, tanba barak mak la konsiente atu halo tratamentu ba nia saude rasik iha fasilidade saude neebe Estadu Timor Leste estabelese.
“Veteranu kuandu moras familia tenke komunika kedas ba Hospital para kareta ambulansia ba tula hodi halo tratamentu, tanba sira terus ba nasaun nee ita tenke respeita sira nia sakrifisiu,” Prezidente CMCLN Baukau, Cornelio Gama “L7” ba jornalista sira iha nia knaar fatin Vila Antiga, Kuarta (08/04/2026).
Nia aprezenta, husi rejistu dadus veteranus tinan 2003, 2005 no 2009 CMCLN Baukau seidauk elabora dadus taxa mortalidade ba nivel Munisipiu nian, maibe iha nivel Postu Laga rejistu ona veteranus nain 510 lakon vida neebe balu falta kontrala saude.
Nia fundamenta, kauza husi moras sira neebe afeta ba veteranus iha Baukau lakon vida uniku parte mediku mak hatene, tanba nee husu veteranus atu hakbesik aan ba fasilidade saude no klinika veteranus Baukau hodi halo tratamentu atu komfirma estadu mediku ba veteranu ida idak nia kondisaun.
“Se kura iha nee labele Konselhu Veteranus tenke asina surat ba Konselhu Veteranus nasional para haruka ba tratamentu iha rai liur,” L7 akresenta.
Iha sorin seluk responsavel Sentru Tratamentu Saude Veteranu, Elísio Siqueira Ximenes aprezenta, durante trimestral dahuluk tinan nee veteranus husi Munisipiu Baukau hamutuk nain 1.820 no husi Munisipiu seluk hamutuk nain 2.275 neebe halao tratamentu saude iha Sentru Tratamentu Saude Veteranu Baukau.
“Sira nee infrenta moras tolu mak hanesan ISPA tanba iklima, maibe moras pulmaun kronik no moras tensaun nee tanba sira idade ona,” Elísio informa.
Nia sublina, husi pasiente veteranus neebe durante trimestral dahuluk halao tratamentu iha Sentru Tratamentu Saude Veteranu Baukau, rejista moras Infesaun Respiratoriu Aguda hamutuk 1.320, pulmaun kronik 1.059 no tensaun 456.
Nia fundamenta, husi pasiente hirak nee balun kondisaun hahu rekupera ona husi moras neebe infrenta, tanba rutina halao tratamentu enkuantu pasiente moras tensaun kontinua halao tratamentu kada fulan.
“Durante nee sira mai mesak halo tratamentu, dala ruma ita mos ba halao tratamentu ba sira nia kondisaun iha uma nomos ita halo promosaun saude ba sira oinsa sira bele kuidadu sira nia saude,” Elísio komenta.
Aliende mos nia dehan, iha inisiu fulan Abril nee Sentru Tratamentu Saude Veteranu Baukau mos tranfere pasiente veteranus nain 3 ba Hospital Rejional Eduardo Ximenes Baukau hodi kontinua halao tratamentu husi mediku no espesialista sira.
Entretantu stock aimoruk iha Sentru Tratamentu Saude Veteranu Baukau atual sufisiente atu fo atendimentu ba pasiente veteranus sira neebe kada loron halao tratamentu iha Sentru Tratamentu refere.
(tom)
