DILI, STLTIMORLESTE.com – Direjente husi Eskola Baziku Central (EBC) Manleuana la autoriza profesores halo violensia hasoru estudantes.
“Iha nee dala ruma profesores sira hirus deit, maibe karik akontese buat ruma nee hau bolu kedas sira, ho nunee hau fo atensaun ba ita nian profesores sira, durante iha hau nian mandatu nee seidauk akontese ida nee, liu-liu hanesan problema violensia todan liu nee laiha ida, karik akontese inan aman sira mai fo hatene hau,” afirma Diretor EBC Manleuana, Carlos Correia ba STL iha nia knaar fatin Manleuana, Sesta nee (19/06/2026).
Nia dehan, nuudar Diretor ho ninia adjuntu la autoriza profesores halo violensia hasoru estudantes sira, nee kualker profesores, nee la autoriza profesores hanorin estudantes ho violensia, tanba kada loron sira sempre halo kontrola iha eskola.
“Ami rua adjuntu Diretor sempre halo kontrola nafatin ba ita nian profesores sira, maibe durante nee ami nian profesores sira la halo violensia ba ami nian estudantes sira, tanba ami nafatin halo kontrolu,” nia afirma.
Iha fatin seluk, Koordenador Eskola Baziku Filial (EBF) Fatumeta, Manuel Pires hatete, dala barak sira nian profesores sira sempre kestiona katak estudantes sira nee mai ho karakter neebe la hanesan, maibe sai profesores nee tenke pasiensia no fuan tenke boot, tanba eduka ema sai ema nee presiza pasiensia, ida nee mak dezafiu boot liu, maibe kada loron sira sempre atende ida nee.
“Dezafiu neebe mak ami infrenta mak agora daudaun nee ami nian profesores, maibe ami kontinua nafatin halo vizilansia iha aulas neebe mak profesores sira agora daudaun iha, nee duni ami halo vizilansia nafatin. Dezafiu oituan mak ami nian estudantes sira mai ho karakter neebe la hanesan, maibe ita labele baku, bainhira ita baku nee ita halo Violensia, ida nee mak dala barak ami hasoru iha sala de aulas,” nia dehan.
Nunee mos Koordenador Eskola Baziku filial (EBF) nu. 5 Comoro, Marcelino Moniz hatete, los duni hanorin iha EBF, estudantes kiik mak barak, tanba nee sira mai ho karakter neebe mak la hanesan no hanorin sira presiza pasiensia.
(jac)
