DILI, STLTIMORLESTE.com – Publiku kestiona kona-ba broker iha Diresaun Jeral Servsiu Rejistu Notariadu, tanba nee ba oin sei la tolera se mak pratika aktu ida nee.
Tuir Diretor Jeral Servisu Rejistu Notariadu, Agustinho Gonsalves Viera katak, se ema ruma haree broker ho matan kaer ho liman, bele hatoo no sei la tolera ba iha aktu broker.
“La toleransia ba broker sira, husu ba rekerente sira labele fo imi nia osan ba ema ida neebe la iha relasaun servisu ho ida nee, bandu atu labele fo tan imi nia osan ba ema sira nee,” dehan nia ba jornalista sira iha Kaikoli, Tersa (11/02/2025).
Nia dehan, se presiza buat ruma ba diretamente hasoru funsionariu no diretor sira iha nee atu atende diretamente nesesidade sira nee.
Broker nee koalia lia anin deit, maibe ema nee iha neebe espiritu santu ita la haree, se iha bolu ema nee mai hodi haree. Konsidera dehan lia anin deit, se iha lori provas mai hodi hatudu ema nee se, atu halo sansaun ruma ba nia la iha toleransia.
Iha fatin hanesan, Adjuntu KAK, Rozario Araujo dehan, sei servisu hamutuk ho Diretor Jeral hodi haree kona-ba kestaun nee atu labele mosu iha Instituisaun Estadu.
Servisu nafatin ho Diretor Jeral sira, koko ba oin atu evita ida nee, lakohi Instituisaun Publiku ida sai fali fatin atu ema idak-idak buka osan iha fatin nee labele,” dehan nia.
Nia hatutan, fatin ida nee servi deit ba estadu no komunidade sira, no kuandu deteta iha duni hahalok sira nee, bele kriminializa, funsionariu ida labele envolve nia aan arbiru atu husu buat oin-oin, no servisu hamutuk ho broker labele.
Aleinde nee, Kordenador Rejistu Sivil Munisipiu Dili, Didiano Rangel Gomes afirma, se ema ruma hatene balu sai hanesan broker, bele fo hatene ba iha Diretor hodi foti media ruma.
Se karik hatene, ba fo hatene iha Diretor, atu Diretor foti medida adekuadu ba aktu sira nee.
(ter)
