DILI, STLTIMORLESTE.com – Labele halao diskriminasaun ba sidadaun ema ho defisiensia, tanba iha lei no Maromak nia oin hanesa deit ho ema neebe kondisaun diak.
Lia hirak nee hatoo husi Feto Potensial, Maria Amaral ba STL liu husi telefone, Segunda (02/12/2024).
Nia dehan, moris iha mundu Maromak halo ema diferente, balu ho kondisaun kompletu, balu ho defisiesia iha matan, balu iha tilun, no liman ain, maibe iha lei nia oin nomos iha Maromak nia oin hanesan, tanba nee labele halo diskriminasaun ba sira.
“Ba inan aman sira neebe mak oan ho defisiensia labele moe lori oan sira ba eskola, nomos ida neebe mak boot ona bele mos kompete iha atividade hotu, maski iha diferente fiziku maibe kakutak no matenek hanesan, tanba nee husu ba hotu-hotu labele halo diskriminasaun ba labarik sira neebe mak ho kondisaun defisiensia, tanba iha Maromak nia oin ita hotu hanesan no iha nia lei nia oin mos ita hanesan,” katak nia.
Nia mos husu ba sidadaun neebe kondisaun ema ho defisiensia labele sente aan katak mesak no labele sente moe atu lao ba oin, tanba ohin loron lei mos garante katak ema hotu iha direitu hanesan iha lei nia oin no iha Maromak nia oin mos hanesan.
Tanba nee presiza trata ema ho defisiensia ho dignu, asesibilidade ba ema ho defisiensia instituisaun no fatin publiku seidauk iha, tanba nee husu tau matan ho dignu.
Nunee mos Madre Marta do Santos hatutan, ema hotu iha direitu hanesan, maski ho kondisaun ema ho defisiensia, maibe iha Maromak nia oin hanesan.
Nunee mos Padre Richardo Pasang, SVD dehan, konfiansa, haraik aan, aten barani, nakloke aan no sinseridade mak odamatan atu hakat liu ba nia hodi hetan bensaun, kbiit no perdaun neebe la iha rohan.
(eme)
