DILI, STLTIMORLESTE.com – Ministeriu Publiku iha nia alegasaun ba krimi Violensia Domestika ho Forma Ofensa Integridade Fizika Simples, solisita ba iha Tribunal Singular atu kondena arguidu DP ho pena prizaun fulan 6 suspende ba tinan 2, tanba konsidera akuzasaun provadu komete krimi hasoru lezada JM.
Iha alegasaun nee, Prokuradora Ivonia Guterres deklara, konsidera akuzasaun provadu hotu, tanba nee husu atu aplika pena suspensaun ba arguidu.
Enkuantu defeza Manuel Exposto husu Tribunal atu aplika pena multa ba arguidu.
Rona tiha deklarasaun, Tribunal adia ba loron seluk hodi rona desizaun.
Tuir akuzasaun neebe iha katak, iha loron 24 fulan Outubru tinan 2023, iha oras tuku 4 dader arguidu halo agresaun hasoru lezada, iha sira nia uma Manleu.
Motivu husi problema nee tanba iha oras tuku 20:00 lezada koalia ho nia primu liu husi telefone, momentu neeba arguidu rona no halo gravasaun ba konversa nee, maibe lezada la hatene katak arguidu halo gravasaun.
Iha oras tuku 4 dader mak arguidu loke fali gravasaun nee hodi rona, mak halo arguidu nervozu, hodi lori aisar baku lezada nia kelen parte karuk dala rua, no kelen loos mos dala rua, lori ain tebe makaas iha lezada nia kotuk laran, no kontinua lori liman tuku iha lezada nia ulun.
Konsekuensia husi arguidu nia hahalok nee, halo lezada sente moras hodi hatoo keixa.
Tanba nee Ministeriu Publiku akuza arguidu komete krime Violensia Domestika ho forma ofensa Integridade Fizika Simples neebe previstu iha artigu 145 husi Kodigu Penal.
Audensia julgamentu nee prezide husi Juiz Singular, Afonso Carmona, Ministeriu Publiku reprezenta husi Prokuradora Ivonia Guterres, arguidu hetan asistensia legal husi Defensor Publiku Manuel Exposto.
(ter)
