DILI, STLTIMORLESTE.com – Lampu regula trafegu ka semaforu (Lampu Merah) neebe lokaliza iha kruzamentu prinsipal area Kolmera, Díli, kontinua mate no laiha funsionamentu iha tempu kalan. Kondisaun nee halo kruzamentu neebe nuudar pontu krusial ba movimentu transporte nian sai nakukun no menus sinal orientasaun nian.
Bazeia ba observasaun direita iha imajen, lampu trafegu (lampu merah) neebe tara deit iha leten iha ninin hatudu kor maran mate total, laiha naroman kor mean, kinur ka matak neebe lakan. Situasaun nee halo utente estrada sira la hetan mata dalan klaru bainhira atu hakat liutiha kruzamentu refere.
Iha imajen nee mos, bele haree klaru katak veikulu roda rua no roda haat kontinua sirkula no hakat kruzamentu maski laiha regulasaun hosi sinal regulador. Motorista sira tenke bazeia deit ba kuidadu pesoal no mos naroman husi lampu oin veikulu nian, nunee bele krusa malu ho seguru.
Fatin kruzamentu Kolmera nee rasik inklui mos kruzamentu zebra kross, neebe destina ba ema lao ain sira hodi hakat hodi hakat fali ba sorin. Iha tempu kalan, ho lampu trafegu (lampu merah) neebe mate, area zebra kross nee mos nakukun, hodi hamosu risku boot ba ema sira neebe atu hakat kruzamentu laran.
Parte kruzamentu no lojas sira iha kruzamentu ninin hatudu naroman neebe mai deit husi lampu sidade nian neebe dook, maibe sentru nian rasik nafatin iha kondisaun neebe menus naroman. Naroman neebe domina deit iha estrada laran maka naroman hosi lampu oin, no lampu kotuk veikulu sira nian neebe liu dadaun.
Movimentu transporte iha kruzamentu nee, maski iha tempu kalan boot, hatudu katak veikulu sira sei sirkula ho velosidade neebe labele kontrola iha sirkuntansia normal, tanba laiha sinal stop nian neebe lakan. Kondutor sira tenke foti desizaun rasik iha tempu badak nia laran, atu kontinua lao ka para hodi fo fatin ba transporte sira seluk.
Motorista Manuel de Oliveira preokupa ho kondisaun neebe naroman menus no laiha sinal regulador neebe lakan, ordem no regulasaun trafegu iha kruzamentu Kolmera nee depende tomak ba konsiensia, no kuidadu husi maluk sira neebe mak liu husi fatin neeba.
“Ita preokupa tebes ho lampu trafegu ( lampu merah) Kolmera neebe mate kleur ona iha tempu kalan no loron, tanba nee husu ba parte kompetente atu hadia lalais, hodi nunee bele evita risku asidente no garante seguransa ba publiku hotu,”dehan Manuel ba STL, Kinta nee (02/07/2026).
Manuel hatutan tan katak, monotorizasaun no manutensaun ba lampu regula trafegu sira iha sidade Díli laran liuliu iha kruzamentu boot sira, tenke sai prioridade hosi instituisaun relevante hodi evita situasaun neebe bele lori perigu ba seguransa publiku iha tempu kalan.
Entretantu antes nee Ministru Transporte Komunikasaun (MTK), Miguel Manetelu hatete, orsamentu ba semaforu foun KAFI aprova ona maka iha prosesu tuir mai sei lansa konkursu publiku iha Komisaun Nasional Aprovizionamentu, no bainhira iha ona empreza manan nain maka sei implementa projetu moderniza sumaforu iha kapital Dili.
(car)
