DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial APB hanesan laen, neebe rakut nia feen ho inisial DTP nia fuuk.
Iha sala julgamentu laran loron Tersa (03/12/2024), Juiz prosesu Ivan Suritai lee sai akuzasaun neebe iha katak, iha loron 10 fulan Fevereru tinan 2024 iha Matadoru, arguidu APB ho kondisaun lanu, rakut ofendida nia fuuk, kaer save motor fai ofendida nia ulun.
Konsekuensia direita husi agresaun fizika nee, ofendida moras no bubu iha ulun, maibe ofendida la ba halo tratamentu iha hospital.
Kauza husi problema nee, tanba arguidu ba diskoteka fila ba uma ho kondisaun lanu.
Arguidu hatene katak hahalok nee punidu tuir lei penal, maibe arguidu kontinua halo.
Tanba nee, Ministeriu Publiku akuza arguidu komete krimi Ofensa Integridade Fizika Simples, neebe previstu iha artigu 145 husi Kodigu Penal, no lei VD numeru 07/2010, loron 07 fulan Julhu.
Hatan ba faktus nee, arguidu deklara katak, faktus neebe konsta iha akuzasaun loot hotu, momentu neeba arguidu kondisaun lanu.
Arguidu rekonhese, lori duni liman rakut ofendida nia fuuk, no lori save fai ba iha ofendida nia ulun, tanba nee ofendida koalia barak.
Arguidu arepende nia hahalok nee, tanba kondisaun lanu fila uma halo agresaun ba ofendida, arguidu promete ba oin la halo tan.
Arguidu deklara tan, momentu neeba mosu tiha problema, liu tiha semana ida arguidu no ofendida diak malu fali, hahu husi neeba too mai agora, sira la iha tan problema ona.
Iha sala julgamentu, Tribunal haree katak arguidu konfesa imparsial ona, Tribunal desidi la rona ofendida nia deklarasaun.
Iha alegasaun Prokurador Napoliao da Silva mantein ho akuzasaun neebe iha, husu Tribunal atu aplika pena multa $ 60 ba Tribunal.
Enkuantu husi parte defeza, Sebastião Amado husu Tribunal atu aplika pena Admoestação ba arguidu, tanba oras nee daudaun sira diak malu ona.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular, Ivan Suritai, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku, Sebastião Amado.
(ter)
