DILI, STLTIMORLESTE.com – Antigu Deputadu husi Partidu Sosial Demokrata (PSD), Leandro Isaac kestiona makaas hahalok lider sira nian neebe hatudu deit imajen hakoak malu iha rai liur, maibe lori fali sentimentu odiu no vingansa iha rai laran.
Iha nia komentariu, Antigu Deputadu nee hatete katak buat neebe akontese durante nee, nuudar deit teatru politika ida neebe la fo ezemplu diak ba komunidade.
Nia haree katak iha forum internasional, lider sira bele tuur hamutuk, hamnasa no hatudu unidade, maibe bainhira fila mai rai laran, sira nia liafuan politika nafatin nakonu husi interese pesoal.
“Atu too bainhira mak situasaun hanesan nee atu hotu, povu presiza matenek no maturidade politika husi lider sira, laos dezenvolvimentu iha liafuan, maibe mos asaun neebe lori dame no unidade real ba rai laran,” dehan Leandro ba STL, iha nia rezidensia Díli, Tersa nee (30/06/2026).
Nia mos hatutan katak, pratika politika vingansa nian sei sai nuudar obstakulu boot ba progresu nasional, no dezafiu boot ba jerasaun foun sira neebe hakarak aprende husi matenek lider koletivu nian.
Iha parte ketak, Akademista husi UNTL, Antoninho Soares mos konkorda ho kestaun nee hodi haktuir katak elite politiku sira presiza duni hatudu maturidade neebe loos, nunee la hamosu fali divizaun emosial ba foinsae no komunidade sira iha baze.
Tanba tuir nia haree edukassun politika neebe diak tenke hahu husi ezemplu neebe loos husi leten.
(car)
