DILI, STLTIMORLESTE.com – Tenente Jeneral Reformado, Atual Asesor Prinsipal Prezidente Republika, Lere Anan Timur hatete, sai lider presiza hakoak ema hotu, labele haree deit ba nia partidu maibe tenke hakoak ema hotu.
Tenente Jeneral Reformadu, Atual Asesor Prinsipal Prezidente Republika, Lere Anan Timur hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Segunda (29/06/2026) hatete, lider neebe diak presiza hakoak ema hotu labele haree deit ba nia ema iha partidu laran.
Tenente Jeneral Reformadu Lere dehan, lider presiza hakoak ema hotu, hanesan mos uluk iha funu ema rezistensia sira hakoak ema hotu mak lori rai nee ba hetan ukun rasik aan, tanba nee ohin loron rai hetan Indepedensia ona lider sira presiza kaer prinsipiu luta nia hodi hakoak ema hotu labele halo diskrimina malu.
“Hau nuudar sidadaun Timor hanesan mos halo funu ida nee hanoin katak se uluk ami la hakoak, lideransa komando Luta la hakoak nia povu karik ita mos la ukun aan, presiza toma konsiensia ba situasaun pasadu, ezemplu hau dehan katak hau FRETILIN nia ema, uluk funu 24 anos FRETILIN sakrifika nia aan nia prinsipiu no valor sira neebe uluk defende antes hahu funu nee nia haluha hotu, porzemplu dehan katak negosiar nao nunka ita ba negosia fali ita nia indepedensia ita ukun aan, dehan deit FRETILIN mak ukun too situasaun la diak dehan Timor tenke hamutuk para ita bele ukun aan,” dehan Lere.
Jeneral Reformadu dehan, sai lider tenke hakoak ema hotu labele haree ba nia partidu ka nia ema deit maibe tenke haree no tau matan ema hotu hanesan.
Nuudar lider laos lider ba nia partidu ou lider ba nia Governasaun deit, maibe lider ba povu tomak, ida nee mak hanoin katak ezemplu diak ba ita nia lider sira,” dehan Tenente Jeneral Reformado Lere Anan Timur.
Iha biban nee nia mos husu ema hotu nafatin hadomi malu, no se deit mak kaer ukun presiza tau matan ba povu hanesan, labele haree deit ba nia ema iha partidu maibe presiza hadomi no hakoak ema hotu.
(eme)
