DILI, STLTIMORLESTE.com – Eis Koordenadór CNRT, Leandro Isaac afirma katak, libertasaun loloos mak hakoak adversáriu politiku sira, no garante igualdade direitu ho justisa sosial ba Povu Timor-Leste tomak.
Iha nia komentariu, Leandro hatete katak risku ne’ebé nasaun hasoru daudaun ne’e iha rua. Risku sekundáriu mak problema barak ne’ebé mosu, maibé risku primáriu maka ida ne’e.
“Oinsá ho lalais liu, liu husi forma oin-oin, ita bele hetan libertasaun husi inimigu nia liman kro’at sira.”dehan Leandro Isaac ba STL, iha Dili, Kinta nee (27/08/2026).
Nia subliña katak dalan ba libertasaun ne’e la’ós ho odiu ka vingansa, maibé ho hanoin boot hodi hakoak ema hotu.
Hakoak ema hotu-hotu, liu-liu ita nia adversárius polítikus sira, zemplu APODETI no sira seluk, hodi fó garantia katak hotu-hotu sei hetan igualdade Direitus ba justisa sosial.”nia afirma.
Tuir Leandro, nasaun sei la ba oin bainhira Líderes nafatin ho hanoin aas ba an rasik.
“Líderes no Ukun Nain sira tenke halo esforsu boot hodi haluha sira-nia egoismu, arrogansia no monopoliu ba lia lós no mós. Labele haluha ema seluk nia direitu”, nia dehan.
Nia afirma katak ho hahalok ida ne’e de’it mak Governu bele fó garantia ba Povu katak, opsaun polítika ne’ebé iha agora ne’e mak di’ak liu.
“Fó garantia bá Povu katak ukun rasik an di’ak liu duni ho opsaun polítika seluk-seluk, tanba ho ukun rasik an maka igualdade direitu sosial, povu sei hetan, maske hahú atu kleur dauk ona”, nia subliña.
Iha nia mensajen ikus, Leandro apela ba sidadaun hotu atu fiar iha Nai Maromak no servisu ho onestu.
“Fiar iha Nai MAROMAK ho ó nia servisu rasik, maibé ho dalan ne’ebé Nai MAROMAK hanorin. Lá bele liman lais, hanesan liu husi Korrupsaun, Subornu ka Manipulasaun seluk-seluk, KKN”, nia alerta.
Eis Deputadu iha primeiru lejislatira nee mós husu, atu labele lakon esperansa maske situasaun difisil. “Esperansa maka ikus liu sei mate, lá bele ‘putus asa/desesperado’”, nia konklui.
Iha parte ketak tuir Observadór Polítika, Antonio Magno, mensajen Leandro Isaac nian importante tebes iha momentu ne’e. Nia dehan, Timor-Leste presiza liu rekonsiliasaun no unidade hodi hadi’a konfiansa públiku ba Estadu.
“Se Líderes kontinua ho egoizmu no la fó espasu ba malu, entaun Povu sei lakon fiar. Mensajen atu hakoak adversáriu polítiku hanesan APODETI ne’e mensajen rekonsiliasaun ne’ebé rai ne’e presiza”, Antonio afirma.
Antonio mós alerta katak luta hasoru KKN no promove justisa sosial tenke sai prioridade boot, hodi prova katak ukun rasik an loloos fó benefísiu ba Povu.
Entretantu Akademista UNPAZ, Manuel Soares hatete katak mensajen Leandro nian reflete nafatin valór fundasaun nasaun nian. Nia dehan, rekonsiliasaun la’ós de’it liafuan maibé tenke implementa iha politika no servisu Governu nian loroloron.
“Se ita la hakoak malu no la respeita diferensa polítika, entaun dezenvolvimentu no justisa sosial sei susar atu alkansa. Ne’e maka lisaun ne’ebé ita tenke aprende husi istória 1999 to’o agora”, Manuel subliña.
(car)
