DILI, STLTIMORLESTE.com — Liurai Bobonaro, Duarte Barros husu Prezidente Republika (PR), José Ramos Horta kontinua kandidata ba PR, atu lidera ASEAN iha 2029.
Duarte Barros hato’o pedidu ne’e ba jornalista STL iha Palásiu Prezidensial Nicolau Lobato, Bairo Pite, Dili, Kinta (27/08/2026). Nia hatete, Timor-Leste foin tama ASEAN, tanba ne’e presiza PR Ramos Horta kontinua iha lideransa nasional atu bele lidera ASEAN iha 2029.
Duarte Barros hatete, nia rona deklarasaun PR Ramos Horta liu husi televizaun no lee iha jornal kona-ba desizaun Prezidente atu la kandidata tan ba mandatu 2027-2032.
“Timor-Leste ema laiha atu ukun lae? Ema barak Timor oan iha S1, S2, S3, no veteranus barak bele ukun. Maibé presiza ema ida hanesan PR José Ramos Horta atu mundu mos bele koñese Timor-Leste,” dehan Duarte.
Nia hatete, maske nia hanesan Liurai Bobonaro no povu Bobonaro hakarak Ramos Horta kandidata tan, desizaun ikus sei depende ba Prezidente Republika Ramos Horta no eleitoradu iha eleisaun prezidensial.
“Se nia hakarak kandidata aan, ami Bobonaro sei reforsa apoiu. Maibé vota sei ba mak povu hare’e no hili,” dehan nia.
Duarte mos hatete, Prezidente Republika Ramos Horta no Primeiru Ministru Xanana Gusmão iha kapasidade atu lori Timor-Leste ba oin, tanba sira iha esperiénsia no rekonesimentu internasionál.
“Hau husi Bobonaro mai atu hasoru Prezidente. Se nia prontu kandidata aan, ami Bobonoro suporta no sei reforsa apoiu,” dehan Duarte.
Aleinde nee, Prezidente Republika Jose Ramos Horta hatete, nia seidauk deside no laiha vontade atu kandidata aan ba Prezidente Repúblika iha períodu 2027-2032.
“Ha’u seidauk deside. Ha’u vontade laiha liu atu kandidata aan ba Prezidente Repúblika,” dehan Ramos Horta.
Nia mos husu kandidatu ne’ebé sei eleitu ba Prezidente Repúblika iha 2027 atu servisu hamutuk ho Governu no Primeiru Ministru Kay Rala Xanana Gusmão.
PR Ramos Horta hatete, Primeiru Ministru sei kontinua lidera Governu iha 2027-2028, antes eleisaun legislativa foun iha 2028.
Nia rekomenda Prezidente Repúblika tuir mai atu halo esforsu hotu-hotu no harii parseria di’ak ho Governu, independentemente husi sé mak sai Primeiru Ministru.
(eme)
