DILI, STLTIMORLESTE.com — Klubu Voleibol Kalma tenki simu derrota depois de lakon hasoru nia adversáriu, Klubu Voleibol Loe-Laco ho skor 3:1, iha kompetisaun Liga Voleibol Timor-Leste Segunda Divizaun, Époka Sestaun 2026. Partida ne’e hala’o iha kampo voleibol Ginásio, Dili, foin daudaun ne’e.
Iha partida ne’e, jogador husi ekipa rua hatudu jogu ne’ebé diak no teknika ne’ebé interessante, liuhusi smash, passing, servis no block. Adeptus no apoiantes sira mos kontinua fó apoiu ba ekipa ida-idak, hodi halo ambiente partida sai animadu.
Iha set primeiru, Kalma komesa partida ho diak no konsege domina kontrolu bola. Kalma konsege manan set primeiru ho skor 25:21, hodi lidera partida 1:0.
Durante partida, treinador husi ekipa rua kontinua uza time-out atu fó motivasaun, orientasaun no korrije estratéjia jogador sira, hodi bele kontinua hatudu performanse ne’ebé diak.
Iha set segundu, Loe-Laco komesa aumenta dominasaun no pressiona Kalman. Ho jogu ne’ebé konsistente, Loe-Laco konsege manan ho skor 25:21, hodi iguala partida ba 1:1.
Iha set terseiru, Loe-Laco nafatin domina kontrolu bola no atake, enkuantu Kalma koko atu responde. Maibé, Loe-Laco konsege manan tan ho skor 25:21, hodi muda lideransa ba 2:1.
Iha set kuartu, Loe-Laco kontinua hatudu dominasaun no kontrola ritmu partida. Kalma hasoru difikuldade atu fila fali ba jogu, no Loe-Laco ikusmai manan set ikus ho skor 25:18, hodi taka partida ho vitória 3:1.
Adeptus no apoiantes husi klubu rua nafatin fó suporta no anima jogador sira durante partida. Apoiu ne’e halo ambiente iha Ginásio Dili sai moris no rame liután.
Ho rezultadu ikus, Klubu Voleibol Loe-Laco sai manan-nain hasoru Klubu Voleibol Kalma ho skor 3:1, iha Liga Voleibol Timor-Leste Segunda Divizaun, Époka Sestaun 2026.
(leo)
