DILI, STLTIMORLESTE.com – Padre Richardo Pasang, SVD hatete, fiar aan demais sei hamoris atitude loko aan no hamoris deskonfiansa ba Nai Maromak.
“Fiar aan demais sei hamoris atitude loko aan. Loko aan sei hamoris deskonfiansa ba Nai no maluk sira. Deskonfiansa hakotu no harahun relasaun, izola aan no hadook aan husi Nai no maluk sira. Nai no ema seluk la importante liu, Torre Babel mak simbolu ema nia loko aan, Nai harahun ida nee. Nai presiza haraik aan, konfiansa atu harii metin relasaun intima ho ita. Ema neebe foti aan Nai sei hatun nia,” dehan Padre Richardo.
Padre dehan, semana VI du Tempu komum, Gen. 11 : 1 – 9 Marc. 8 : 34 – 39 tanba orgulhu ba identidade ho lian ida deit, sira monu ba hahalok loko-an hodi harii sidade ho torre ida aas too lalehan.
“Nunee, ita sei hetan naran boot, sei la lao namkari lemo rai tomak. Tanba loko aan nee, Nai harahun sidade nee no halo sira bilan no la hatene koalia ho lian saida deit. Sira la komprende malu. Nai halo sira namkari lemo mundu rai klaran, sira mos husik sira nia servisu iha sidade. Torre nee hanaran Babel katak iha neba, Nai halo sira la komprende malu. Nai nia asaun ida nee hodi hatudu ba Izrael oan sira katak Nai Maromak lakohi ema sira loko aan. loko aan mak hahalok ida neebe hadook aan, no la fiar ona Maromak. Fiar ba sira nia aan rasik,” dehan Padre Richardo.
Nia hatutan, Nai hakarak hanorin Nia povu sira atu haraik aan. Tanba ho dalan haraik aan no mizeria, Nai Maromak harii uniaun ho nia povu sira. Ho dalan haraik aan, Jesus Kristu harii uniaun ho Eskolante sira hodi hakribi aan rasik, lori Nia kruz no lao tuir Jesus. Ba ema neebe lakon nia moris tanba Hau no Evanjelhu, nia sei hetan salvasaun. Nee mak dalan haraik aan neebe Nai hanorin no hatudu iha Nia gloria Aman Maromak nian hodi dehan, ida nee mak Hau Oan doben, rona Nia ba.
“Loko aan sempre halo ita haketak malu ho ita nia maluk sira. Loko aan bele halo ema la fiar ona Maromak. Loko aan halo ema orgulhu ho sira nia pozisaun, rikusoi, estatus moris iha sosiedade. Bele halo ema monu ba loko aan espiritual. Maibe, haraik aan halo ita metin nafatin iha uniaun ho ema seluk, familia no sosiedade. Mai ita hotu moris iha dalan haraik aan atu bele sai Nia Eskolante neebe fiel nafatin,” katak padre.
Padre Richardo dehan, ema neebe loko aan, ema la fiar Maromak no tau konfiansa liu fali ba nia riku soin mundu, maibe ema neebe haraik aan ho fiar Esperitu Maromak nia metin ho Kristu.
(eme)
