DILI, STLTIMORLESTE.com – Inan aman neebe mak iha oan defisiensia, lori sira ba eskola neebe besik, tanba sira iha direitu asesu ba edukasaun.
Bento Moniz da Costa nuudar defisiensia dehan, dala ruma familia liu-liu inan aman neebe sira nia oan defisiensia, sira husik deit iha uma no la lori sira ba eskola, tuir lo-loos lori sira ba eskola neebe mak besik sira nian hela fatin para sira labele lakon sira nian direitu atu asesu ba iha edukasaun, tanba sira iha direitu ba eskola hanesan ho sira nia maluk sira seluk.
“Hau mos moris mai ho kondisaun defisiensia, maibe hau nia inan aman apoiu hau nian estudu too remata sekundariu, hodi hau mai legaliza diploma iha ministeriu, maibe nee depende husi familia ida-idak nian konsiensia deit, hau remata hau nian estudu iha tinan kotuk, agora hau sei tuir hela kursu komputador,” afirma Bento ba STL iha edifisiu ME, Tersa nee (11/08/2026).
Bento hatutan, nafatin agradese ba familia neebe durante nee apoiu ona ninia estudu hahu husi edukasaun pre eskolar too mai ohin loron remata sekundariu, maibe iha hanoin neebe diak, fo tan oportunidade asesu ba edukasaun non formal mos importante, para bele aumenta konhesimentu.
“Hau hanoin depende konsiensia husi familia ida-idak nian, balun apoiu oan defisiensia nian estudu too ensinu superior, maibe balun husik deit iha uma, nee labele, maske oan ho kondisaun nunee, maibe iha direitu asesu ba edukasaun,” katak nian.
Iha fatin seluk, Odete Nunes da Costa Marques hanesan inan neebe oan defisiensia hatete, ninia oan agora daudaun remata ona estudu nivel sekundariu, maibe atu haruka nia kontinua ba iha ensinu superior, maibe sei haree ba orsamentu, no agora daudaun lori nia atu ba tuir kursu lian english no komputador, tanba edukasaun non formal mos importante tebes, nee duni nuudar inan aman sempre fo apoiu tomak ba oan nian estudu, maske oan ho kondisaun defisiensia, labele lakon oportunidade hanesan ho ninia maluk sira seluk.
“Hau nian oan nee dezde ho idade tinan lima, hau lori nia ba eskola TK, tanba ita inan aman nian responsabilidade mak ita nia oan sira tenke asesu hotu edukasaun, tanba nee lalika haree ba oan nian kondisaun, maibe motiva nafatin, atu nunee hau nia oan mos tenke hetan edukasaun hanesan ho ninia maluk sira, hau agradese tanba agora hau nia oan remata ona ninia estudu iha tinan kotuk,” dehan nia.
Odete akresenta, ninia oan hamutuk nain haat, ida ho kondisaun defisiensia nee oan ba dala tolu, nee duni inan aman neebe sira nia oan defisiensia, bainhira sira nian idade too ona atu eskola, tenke lori sira ba, tanba nee sira nian direitu atu asesu ba iha edukasaun, labele husik sira iha uma deit, nee labele, maibe presiza lori sira ba eskola.
“Hau sempre fo hanoin ba hau nia oan katak, maske ho kondisaun defisiensia maibe labele lakon vontade atu aprende, ninia dalan mak tenke esforsu aan estuda, no agora hau haruka nia atu asesu ba edukasaun non formal, no tinan oin hau sei suporta ninia estudu ba too iha universidade,” dehan nia.
Entretantu Juliana Nunes da Costa hanesan defisiensia dehan, maske ho kondisaun defisiensia, maibe agradese tanba ho inan aman no familia hotu nian apoiu bele remata ona estudu nivel sekundariu iha tinan kotuk, no agora atu aprende tan lingua english no komputador, nafatin iha vontade neebe diak atu aprende.
“Maske hau ho kondisaun defisiensia, maibe agradese tanba ho inan aman no familia hotu nian apoiu bele remata ona estudu nivel sekundariu iha tinan kotuk, no agora hau atu aprende tan lingua english no komputador, nafatin iha vontade neebe diak atu aprende,” nia afirma.
(jac)
