DILI, STLTIMORLESTE.com – Eis Prezidente Republika atual Prezidente Partidu FRETILIN, Francisco Guterres Lú Olo hatete, tempu paskua ema idak-idak presiza halao reflesaun ba nia aan.
Prezidente Partidu FRETILIN, Francisco Guterres Lú Olo hatoo kestaun nee ba jornalista sira, bainhira remata hasoru malu ho kuadru rezistensia iha Farol, Dili, Sesta (04/04/2025).
Eis Prezidente Republika nee hatete, tempu paskua ema idak-idak nuudar sarani presiza husu perdaun ba malu no halao reflesaun ba idak-idak nia aan, nunee ho Jesus nia mate no moris hias bele lori salvasaun ba ema hotu.
“Paskua nee tempu ba ita atu halao reflesaun, nuudar sarani periodu ida nee hotu-hotu hanoin para halo reflesaun hamutuk hodi fo perdaun malu, liu husi sakrifisiu neebe mak ita Nai Jesus Kristu halao iha tempu ida nee, ho Nia (Jesus) moris hias bele salva ita hotu,” dehan eis PR, Lú Olo.
Nia hatutan, ho refleksaun neebe idak-idak halo ba aan ho Espiritu Maromak nian, prepara aan ho diak nunee bele partisipa iha selebrasaun paskua ho dame no domin.
Nunee mos Sekretariu Jeral Partidu FRETILIN, Mari Alkatiri hatutan, paskua signifika pas ema idak-idak presiza halao reflesaun ba aan, nunee kria pas no dame iha rai laran.
“Paskua signifika pas, paskua loron Katolika nia, maibe ba pas nee ita hotu hakarak, ita hakarak domin no pas, no aproveita loron boot nee halo reflesaun boot hamutuk lori pas, nunee labele iha tan konflitu iha Timor,” katak SekJer Partidu FRETILIN Mari.
Nia hatutan, tempu paskua sarani Katolika sei selebra, maibe tempu nee mos ema hotu presiza kria pas no dame, nunee lori hakmatek iha rai laran.
“Lider nasional nee ema eleitu mak lider nasional, ema la eleitu laos Lider Nasional, no sira neebe mak eleitu nee mak iha responsabilidade hodi rezolve problema,” dehan Eis Primeiru Ministru nee.
(eme)
