DILI, STLTIMORLESTE.com – Eis Deputadu Bankada Partidu Sosial Demokrata (PSD), Leandro Isaac lansa kritika makas kona-ba pratika infiltrasaun mafia neebe agora dadaun lao ho seguransa no liberdade iha Timor-Leste (TL). Tanba tuir nia kazu sira hanesan jogu Online neebe deskobre husi Ajensia ONU foin lalais nee, hanesan prova ida katak korrupsaun no koluzaun buras tebes iha rai laran.
Eis Deputadu nee nota katak, impaktu boot husi mafia sira nee mai husi lideransa politika sira, neebe iha ambisaun desmedida ka la iha sasukat (egoista).
“Bainhira ukun nain sira iha ambisaun neebe la iha sasukat, hodi hakarak nafatin kaer ukun liu husi dalan neebe la tuir regra, nee loke dalan ba mafia atu tama,” dehan Eis Deputadu Leandro ba STL, liu husi telefone, Kinta (22/04/2026).
Eis Deputadu iha Primeiru Lejislstura nee la menta tebes ho kondisaun instituisaun Seguransa no Justisa nian. Nia sublina katak Timor-Leste presiza ajente judisiariu ( Polisia, Prokurador no Juíz) neebe iha kapasidade teknika atu investiga, la tauk atu hasoru poderozu sira no lao tuir lei laos lao tuir interese partikular.
“Infelizmente kriteira tolu nee ita seidauk iha. Uituan neebe ita iha tendensia mak sai konivente ka envolve aan kria koluzaun no hanutuk ho mafia sira atu komete krime,” dehan nia.
Aleinde nee kona-ba kazu Online neebe deskobre foin lalais nee, Eis Deputadu nee sente triste tanba kazu sira neebe iha rai seluk bele sai skandal boot, maibe iha Timor-Leste, kazu sira hanesan nee no mos hahalok ukun nain sira neebe deskonfia sai asesor ba empreza suspeitu iha liur sai lia laiha (silensiu).
“Ita nia matenek nain no ativista direitu sira, agora dadaun iha hela agonia nia laran, hein mate deit tanba haree situasaun nee la hatudu mudansa,”hatete Leandro.
Leandro Isaac husu ba povu no instituisaun relevante sira tenke reforsa mekanizmu vijilansia atu detekta sedu mafia sira, tanba se la kombate lalais, mafia sei sai nain ba rai ida nee maski ho naran dezenvolvimentu ka investimentu.
Iha parte ketak Akademista UNPAZ, Jose da Silva husu ba Governu atu kontrola ema estranjeiru sira neebe tama mai iha rai laran, ho nuneru neebe boot hodi halao atividade ilisita iha rai laran.
“Situasaun nee se la kontrola ho rigor, bele provoka konflitu sosial neebe naruk, no afeta afeta ba soberania Estadu nian,” dehan nia.
(car)
