DILI, STLTIMORLESTE.com – Komunidade sira presiza hamoos valeta sira, nunee bele hadook aan husi moras dengue iha sosiedade nia leet.
Lia hirak nee hatoo husi Vise Ministru Fortalesimentu Ministeriu Saude, Jose Reis Magno ba jornalista sira iha Palasiu Prezidensial Bairo Pite, Tersa (03/12/2024).
Nia husu ba komunidade atu prevene moras dengue liu husi hamoos bee dalan no bee nalihun sira neebe besik iha uma tatis.
Visi Ministru dehan, daudaun nee udan hahu monu rai ona, oinsa mak komunidade idak-idak halo prevensaun ba nia aan atu evita moras dengue liu husi hamoos valeta ka bee foer sira neebe besik uma nunee bele prevene aan husi moras nee.
“Prevensaun diak ba moras dengue mak atividade barak, lo-loos los ita boot sira hatene, ita nia ambiente nee ita tenkeser kontrola no moos hela deit, ita tenke haree ba iha bee, iha uma oin no uma laran, bee tanki nee tenke hamoos beibeik, se priodikamente tau abate ba para susuk oan sira nee bele mate hotu,” dehan nia.
Nia tenik, jornalista sira haree iha valeta sira iha Dili laran governu halo esforsu makaas los, liu husi obra publika halo servisu makaas los para atu loke luan tan valeta sira nee, mais kuandu udan oituan, haree akua mamuk sira nee nakonu los iha valeta sira, ida nee halo intupidu no kria susuk fatin iha neeba, no Governu kontinua esforsu maibe ida nee fila fali mos ba komportamentu ema idak-idak nia.
Nia hatutan, falisidade saude sira mos fahe ona makina fomigasaun hodi kaer susuk, neebe ai-moruk malationa neebe agora daudaun lao hela iha area-area sira neebe sente katak risku boot.
(eme)
