DILI, STLTIMORLESTE.com – Makina Imprime Bilhete Identidade (BI) iha, maibe oras nee daudaun balu sei imprime ho surat tahan mutin.
“Makina iha maibe momentu inaugura balkaun iha Manatutu nee mak uza provizoriu tiha iha neeba, maibe tempu badak ita prepara sei koloka fali mai iha nee,” dehan Diretor Jeral Servisu Rejistu Notariadu, Agustinho Gonsalves Viera ba jornalista sira iha Kaikoli, Tersa (11/02/2025).
Nia hatutan, blanko ba BI iha, maibe parte sira husi Konservatoriu mak la halo akizasaun hodi husu, no sira seidauk haruka pedidu ba atu husu, maske limitadu maibe iha duni.
Maibe la taka dalan sira hasai foto iha Konservatoriu Munisipiu Dili nian, sira bele ba print iha Nasional, hanesan sira neebe prioridade bele halo ba iha neeba, maibe Jestor iha Konservatoriu mak hatene atu haruka sira nebee prioridade ba.
Iha fatin hanesan, Komisariu Funsaun Publiku Asuntu Disiplinar, Agapito da Conseisao dehan, difikuldade neebe sira hasoru mak kona-ba makina.
Ezemplu, makina neebe atu produs BI orijinal, sujere atu atende lalais, la bele atende fali ho surat tahan mutin. No difikuldade neebe sira hasoru mak kona-ba makina iha tinan 2022, 2023 no 2024 sei hadia, espera iha vizita segundu makina bele iha ona.
“Provizoriu sei atende ho surat tahan mutin, ba urjentemente sira neebe halo pasaporte liu-liu sira neebe ba eskola, moras no ida neebe ba servisu iha rai liur,” dehan nia.
Aleinde nee, Koordenador Rejistu Sivil Munisipiu Dili, Didiano Rangel Gomes afirma, oras nee daudaun difikuldade neebe sira hasoru mak kona-ba makina.
“Se ami husu mos ami atu print ho saida, tanba ami makina la iha, ida nee ami nia difikuldade,” dehan nia.
Ni dehan, print ho nia makina propria, laos hatama ba printing print deit la iha, nia makina apropriadu duni kona-ba print kartaun nian, laos makina baibain.
Makina laos la iha, maibe estabelese balkaun unika iha Manatutu makina nee sira uza hela, provizoriu lori ba responde hela ida nee.
Kona-ba Bilhete Identidade, nia parte dehan, provizoriu emite surat tahan mutin.
(ter)
