DILI, STLTIMORLESTE.com — Klubu Voleibol Mameran sai hanesan vencedór depois de derrota klubu Voleibol Jofirman ho skor 3:1, iha kompetisaun Liga Voleibol Timor-Leste Segunda Divizaun, Époka Sestaun 2026. Jogu ne’e hala’o iha kampu voleibol Ginásio, Dili, foin daudaun ne’e.
Iha partida ne’e, ekipa rua hatudu kapasidade no teknika jogu ne’ebé diak, liuhusi smash, passing, servis no block. Jogador sira hato’o kompetisaun ne’ebé maka’as hodi hatudu kualidade no abilidade ba adeptus no apoiantes sira ne’ebé mai asiste partida.
Iha set primeiru, ekipa rua komesa partida ho jogu ne’ebé ekilibradu. Maibé, Jofirman konsege domina kontrolu bola no remata set ne’e ho vitória 25:15, hodi lidera partida ho vantagem 1:0.
Iha set segundu, Mameran komesa aumenta presaun no melhora sira nia jogu. Dominasaun Mameran halo Jofirman hetan difikuldade atu responde, no Mameran konsege manan ho skor 25:15, hodi iguala rezultadu ba 1:1.
Iha set terseiru, Mameran nafatin hatudu dominasaun, liuliu iha atake no kontrolu bola. Maski Jofirman koko atu fó rezisténsia, Mameran konsege manan set ne’e ho skor 25:21 no muda lideransa ba 2:1.
Iha set kuartu, Mameran nafatin kontrola ritmu partida no kontinua pressiona Jofirman. Dominasaun ne’e ikusmai fó rezultadu ho vitória 25:14, hodi asegura vitória jeral ho skor 3:1.
Partida ne’e sai moris liután tanba apoiu husi adeptus no apoiantes husi klubu rua, ne’ebé kontinua anima jogador sira durante partida.
Ho rezultadu ikus ne’e, Klubu Voleibol Mameran sai manan-nain hasoru nia adversáriu Jofirman ho skor 3:1, iha Liga Voleibol Timor-Leste Segunda Divizaun Époka Sestaun 2026.
(leo)
