BAUKAU, STLTIMORLESTE.com – Organizasaun Naun Governamental Mane ho Vizaun Foun hamutuk ho Autoridade Munisipiu Baukau selebra loron mundial labarik iha eskola Ensinu Baziku Filial Osso-Queli, Postu Administrativu Vemasi.
Diretor Ezekutivu Mane Ho Vizaun Foun, Américo de Araujo informa, selebrasaun loron mundial labarik neebe Mane ho Vizaun Foun implementa iha Osso-Queli apoiu husi Plan Internasional no hetan kolaborasaun husi Organizasaun Naun Governamental Futuru neebe apoiu fundus husi Uniaun Europeia ba durasaun tinan tolu iha Munisipiu Baukau.
Konsidera loron 01 Junhu loron espesial ba labarik sira iha mundu inklui iha Timor Leste, tanba nee Mane ho Vizaun Foun inisia selebra loron labarik hodi anima labarik sira iha mundu liu-liu iha EBF Osso-Queli tuir tema difinifu.
“Iha Baukau Mane ho Vizaun Foun hili selebra hamutuk ho alin sira iha Eskola Osso-Queli nian ho tema livre atu sai aan rasik, empodera labarik sira vulneravel liu atu reklama sira nia direitu ka foku ba realizasaun direitu labarik,” hateten Américo ba jornalista sira iha Osso-Queli Vemasi, Kinta (05/06/2025).
Nia esplika, tema refere Mane ho Vizaun Foun prioridade, tanba daudaun labarik barak iha Timor liu-liu iha area remotas sira hanesan Osso-Queli sei vulneravel, nunee tema refere atu reflete sidadaun sira kuida labarik, tanba iha lei garante direiru ba labarik goza direitu tuir moris labarik nian no foti desizaun ba moris.
Américo iha esperansa ba selebra loron mundial ba labarik tinan nee, labarik sira sei livre husi violensia no livre husi asaun no presaun, maibe lori labarik sira no empodera labarik sira sai prezente ba nasaun.
Reprezentante Prezidente Autoridade Munisipiu Baukau, Sebastião Ximenes hateten, labarik sira iha direitu atu asesu Edukasaun, Saude no seluk tan.
“Iha konstituisaun artigu 18 garante fo protesaun ba labarik sira, tanba nee labarik sira iha direitu atu asesu ba edukasaun, saude no seluk tan,” katak Sebastião.
Estudante Dalila Correia Belo espresa sentimentu kontente iha ambitu selebrasaun loron mundial labarik iha Osso-Queli, tanba Autoridade no parseiru lori programa no direiru sira hakbesik aan ba komunidade sira iha remotas.
“Sente kontente tebes, tanba sira bele mai selebra ami nia loron iha ami nia suku no ami agradese tebes,” espresa Dalila.
Entretantu selebrasaun loron mundial labarik selebra iha EFB Osso-Queli hetan partisipasaun masimu husi Autoridade lokal no inan aman estudante sira.
(tom)
