DILI, STLTIMORLESTE.com – Nuudar manorin nain senti kontenti no haksolok, bainhira haree estudante sira nia susesu ho kargu ka profisaun neebe daudaun sira leba hodi kontribui ba nasaun ida nee.
Profisaun nuudar manorin nain nia kontenti no susesu laos deit servisu para manan osan fulan-fulan husi governu, maibe oinsa mak atu halao knaar ho responsabilidade no masimu para nunee estudante sira bele sai naroman no susesu iha futuru. Bainhira haree estudante sira sai susesu, ida nee mak susesu husi profisaun manorin nian.
Tuir Profesor Silverio Rebelo husi Eskola Katolika São Jose Operario hatete, manorin nain nia kontenti no susesu mak bainhira haree estudante sira nia susesu no kontenti ho sira nia futuru neebe sira leba ba.
“Hau kontenti tebes bainhira hasoru no haree hau nia estudante sira neebe uluk hau hanorin iha 2012, neebe oras nee balun sai susesu ho sira nia profisaun oi-oin neebe mak agora sira iha no leba daudaun. Bainhira hasoru direta balun hau haluha ona, maibe sira nain mak hakilar no komprementa bolu profesor sei hanoin hau ka lae, rona ida nee halo hau nia sentimentu kontenti no triste nee kahur deit, tanba haree sira neebe uluk sei hatais farda eskola, ohin sira hamriik iha ita nia oin ho farda servisu hanesan mediku, militar no seluk tan. Neebe ida nee mak ita nia sentimentu bainhira hasoru ita nia oan estudante sira neebe mai ho susesu,” dehan nia ba STL iha Balide, Tersa (16/06/2026).
Nia hatete, ida nee atu dehan deit edukasaun neebe sira hetan husi familia no manorin nain sira, sira rona no halo tuir buat neebe mak professor sira fo nomos buat neebe inan aman sira hanorin no koalia. Tanba atu hetan futuru neebe diak, liu husi eskola no edukasaun mak muda ema nia moris sai nabilan iha futuru ba familia, nasaun no sosiedade.
Nunee mos Profesora Fransisca da Costa husi Eskola Amigos de Jesus haktuir, pesoal senti kontenti tebes bainhira haree estudante sira nia susesu. Liu-liu bainhira lao iha dalan ou ba ospital, hasoru iha dalan sira nain mak aprezenta aan dehan professor sei konese ka lae. Dala ruma la konese tiha sira, tanba sira iha mudansa barak ona. Balun hasoru uza farda militar fo komprementa no hola bensa, depois mak husu dehan profesora konese hela ka lae.
“Hau kontenti los bainhira hasoru oan estudante sira neebe susesu nafatin komprementa no hasee uluk ita, tanba balun hau haluha ona. Hau nia estudante balun neebe hanorin iha tempu Indonesia nee, hau haluha los tiha maibe sira sei konese hau. Bainhira ba konsulta iha ospital no klinika, hakfodak bainhira sira ho farda servisu mediku no infermeira nian mai hasee no komprementa. Haree ba situasaun neee halo hau senti kontenti no halo hau laran monu tanba hare sira nia susesu ba mudansa iha sira nia moris,” dehan nia.
Nia hatutan, hakarak atu oan estudante sira nia future atu susesu manorin nain sira tenke halao knar ho responsabilidade, para nunee labarik sir abele susesu iha future. Laos deit husi eskola maibe inan aman iha uma mos tenke tau matan no hakas sira estuda, tanba liu husi edukasaun deit mak bele muda ema nia moris. Tanba nee estudante sira tenke aporveita tempu hodi estuda ho diak, atu nunee imi bele susesu iha futuru.
(dom)
