DILI, STLTIMORLESTE.com – Oras nee daudaun mateial neebe atu fo apoiu emerjensia ba eskola hirak neebe hetan estragus husi udan no anin iha area remotas, nee sufisiente hela iha Armajen Ministeriu Edukasaun, no eskola neen daudaun nee sei hetan apoiu.
Lia hirak nee hatoo husi Diretor Nasional Edukasaun Inkluzivu Asaun Sosial Eskolar, Fernando Soares ba STL iha nia knaar fatin, Kinta nee (25/06/2026).
“Hau hanoin ita nian material atu fo apoiu emerjensia ba ita nian eskola hirak neebe hetan estragus husi udan no anin boot nee, hau hanoin material sei sufisiente hela iha ita nian armazen. Material neebe atu apoiu ita nian eskola nee hanesan kalen, besi no baut, nee duni aban nunee ami sei halo verifiksaun, atu nunee bele fo apoiu ona ba ita nian eskola neebe hetan estragus, ninia pedidu mai ona iha ME liu husi ami nian diresaun,” nia dehan.
Fernando dehan, pedidu nee sira nian diresaun simu ona, hein deit atu halo distribuisaun ba material sira nee, fulan ida ba kotuk no fulan nee sira seidauk simu pedidu foun, maibe hahu husi fulan Janeiru nee mak simu pedidu foun eskola neen mak hetan estragus, eskola sira nee hein atu halo distribuisaun material apoiu emerjensia ba sira, ho nunee bele hadia eskola neebe estragus husi udan no anin neebe mak akontese durante nee.
“Kuaze ita nian eskola neen hanesan nee, ita halo distribuisaun agora nee ensinu baziku no pre eskolar ida, nee lokaliza iha Munisípiu Ermera, Lautem ho Munisipiu Viqueque, eskola sira nee hetan estragus hahu husi fulan Janeiru mai tinan nee. Ita halo tiha distribuisaun ba uluk eskola neen, depois karik pedidu foun tama nee ita nafatin halo distribuisaun material apoiu emerjensia ba ita nian eskola sira,” katak Fernando.
Nia salienta, Ministeriu Eduksaun (ME) liu husi sira nian diresaun hein pedidu mai husi Diretor SEM sira, tanba bainhira eskola hetan estragus nee direjente husi eskola sira hatoo ba iha SEM hodi bele submete pedidu nee mai iha ME nasional para bele hetan apoiu material emerjensia.
“Ita nian eskola hetan estragus nee balun estragus kmaan no balun mak todan, maibe ida estragus kmaan nee bele atende ho konsesaun eskolar, maibe hirak neebe hetan estragus grave nee presiza duni ami nian ajuda, tanba ita nian material iha armazen sei sufisiente hela hodi halo distribuisaun ba ita nian eskola,” nia esplika.
“Konaba asuntu eskola neebe hetan estragus husi anin no udan nee ami nian parte seidauk simu informasaun ruma husi eskola sira, nee duni bainhira iha nee husi eskola sira fo informasaun ba ami,” nia esplika.
Nunee Diretor Nasional Ensinu Sekundariu iha ME, Benjamin Gomes da Cruz Fernandes hatete, eskola neebe estragus, oinsa ME bele apoiu material para bele hadia fali eskola neebe hetan estragus husi udan no anin.
“Ita nian eskola neebe estragus, oinsa ME bele apoiu material para bele hadia fali eskola neebe hetan estragus husi udan no anin,” nia refora.
(jac)
