DILI, STLTIMORLESTE.com – Ministériu Edukasaun (ME) hahú distribuisaun materia ezame nasionál ba diretór servisu edukasaun munisipál sira, hodi prepara ezame nasionál ba tinan letivu 2026, ne’ebé sei hala’o husi loron 19 to’o 22 fulan Outubru.
Ministra Edukasaun, Dulce de Jesus Soares, hateten ida-ne’e ba jornalista sira iha Sentru Impresaun Comoro, Sesta (16/10/2026), durante serimónia lansamentu distribuisaun materia ezame nasionál.
“Ohin loron, Ministériu Edukasaun iha nível nasionál no munisipál halo lansamentu distribuisaun materia ezame nasionál ba tinan letivu 2026, ne’ebé sei hala’o husi loron 19 to’o 22 fulan ne’e,” ministra dehan.
Dulce de Jesus Soares esplika katak, hahú husi loron ne’e, diretór servisu edukasaun munisipál sira sei lori materia ezame nasionál ba munisípiu ida-idak, ho akompañamentu husi membru Pó lisia Nasionál Timor-Leste (PNTL), atu asegura seguransa no entrega materia ezame nian to’o iha eskola sira.
Nia haktuir katak, to’o Segunda-feira, materia ezame nasionál hotu-hotu sei to’o ona iha eskola sira, atu estudante sira bele tuir ezame tuir kalendáriu no oráriu ne’ebé Ministériu Edukasaun prepara ona.
“Ho ida-ne’e, ami husu ba komunidade tomak, liuliu inan-aman sira, atu fó apoiu ba sira-nia oan sira, hodi kria kondisaun ne’ebé saudavel iha uma no ambiente ne’ebé sira hela, atu bele prepara an ho di’ak ba ezame,” nia dehan.
Ministra Edukasaun mós husu atensaun espesiál ba estudante sira iha klase 9, Ensinu Baziku, no klase 12, Ensinu Sekundáriu, atu mantein kondisaun saúde ne’ebé di’ak, hodi bele prepara an no partisipa ho di’ak iha ezame nasionál ne’ebé konsidera importante ba sira-nia prosesu aprendizajen.
(jac)
