DILI, STLTIMORLESTE.com – Ministeriu Edukasaun (ME) mantein husu eis profesores kontratu 2023 atu partisipa iha teste espesial neebe iha tempu badak sei loke ba eis profesores sira.
Dehan portavos Ministeriu Edukasaun (ME), Filipe Rodriques Pereira liu husi konferensia imprensa neebe halao iha sala VIP, ME, Kinta (06/02/2025).
“Hanesan liu ba hatete ona ba sira katak, iha tinan kotuk sira mos hatoo sira nian kondisaun, maibe ikus mai ita rona porta voz katak, sira prontu tuir teste, maibe sei iha sira nian hanoin balu ho kondisaun balu, maibe espera katak, ho deklarasaun ida ikus ida nee ME nian maluk eis profesor kontratu 2023 bele hola parte teste espesial neebe ministeriu sei loke, teste espesial nee prioridade ba eis profesores kontratu 2023,” nia afirma.
Nia dehan, Governu liu husi ME hakarak hadia kualidade edukasaun, neebe teste nee nudar meus ida atu selesiona profesores neebe kualidade atu hanorin iha futuru, neebe hanoin teste ninia lalaok hatene hotu ona, sira estuda, fiar katak sira neebe estuda bele hetan rezultadu diak iha teste espesial.
“Hau hanoin ita nian eis profesores kontratu 2023 sei kritiku tebes, hau espera sira matenek deit mak barak iha nee, sira sempre mai halo dialogu ho ami, sira mesak ema kritiku no matenek deit. Teste espesial nee sei halao iha tinan nee, hahu husi nível Ensinu Sekundariu Jeral no Tekvo, nee duni dialogu neebe ami halao informa ona ba sira, atu solusiona problema eis profesores kontratu 2023 nee, ninia fatin mak ME, teste espesial neebe prepara ba eis professor Ministra konsulta ona ho PM, no PM iha konhesimentu ba ida nee,” dehan nia.
Iha fatin hanesan, Koordenador eis profesor kontratu 2023, Celestinho Julio Belo hatete, iha momentu neeba sira nian porta voz konkorda partisipa iha teste espesial, maibe ho kriteriu katak, tenke halo akordu ida, tanba saida mak durante nee sira rezeita teste espesial nee, tanba kestaun dekretu lei numeru 31/2023, ida nee mak razaun fundamentu, maibe ME nafatin obriga sira partisipa teste espesial, entaun ho kriteriu.
“Ami seidauk hatene sira nian desizaun ba ami nian problema, foin daudaun ami enkontru ho Sekretariu Estadu ho dirijenti hotu, sira aprezenta programa teste espesial ba profesores kontratu 2023, maibe momentu neeba ami rezeita no sira fo semana rua ka tolu atu prepara fai opsaun seluk, depois hasoru malu ho asesor juridiku no DJ ME husu para ami partisipa iha teste espesial nee,” katak nia.
(jac)
