DILI, STLTIMORLESTE.com – Ministeriu Edukasaun (ME) liu husi Edukasaun Munisipiu Dili halo identifikasaun ba informasaun neebe komunidade balu hela areador eskola fo aluga fali uma ba ema seluk.
“Ekipa ami nian sei lao hela, atu identifika los duni ka lae, informasaun neebe mak fo aluga fali uma iha areador eskola ninia, tanba ita presiza dadus, maibe ami nian ekipa lao hela para bele identifika dadus sira nee, tanba lo-loos nee iha areador neebe mak ita nian komunidade hela nee sira fo duni aluga ba komunidade seluk nee los ka lae, tanba nee daudaun sei halo hela identifikasaun iha terrenu,” afirma Diretor Servisu Edukasaun Munisipiu Dili, Sabino Perreira ba STL iha nia knaar fatin, Kuarta nee (12/02/2025).
Nunee mos Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos dehan, klaru katak bainhira hela iha patrimoniu estadu seidauk halo buat ruma iha nee, nee duni klaru sei la fo indemnizasaun, tanba uma nee estadu Indonezia mak halo, agora ukun aan ona klaru nee patrimoniu estadu nian.
“Hau hanoin ida nee kompetensia nee iha Diretor Edukasaun Munisipal, nunee Edukasaun Munisipal hamutuk ho Prezidente Autoridade Munisipal halo nusa para livre komunidade sira neebe mak okupa hela resintu eskola sira nee,” nia esplika.
Iha fatin seluk, Diretor ESJ nu. 4 Setembru Balide, Sergio A. da Cruz hatete, komunidade neebe mak hela iha resintu eskola ida nee, sira hela tinan barak nia laran ona, maibe lo-loos resintu nee fatin neebe profesor sira uza halao aprendizajen ba estudante sira,.maibe komunidade sira mos hela hotu iha laran, depois aprendizajen lao hela, sira uza transporte tama no sai iha areador eskola.
“Ita nian komunidade neebe mak hela iha resintu eskola ida nee, sira hela tinan barak ona, maibe lo-loos nee resintu nee fatin neebe profesor sira uza halao aprendizajen ba estudante sira, maibe komunidade sira mos hela hotu iha laran, depois aprendizajen lao hela,.sira uza transporte tama no sai iha areador eskola nian,” katak nia.
(jac)
