DILI, STLTIMORLESTE.com – Ministeriu Edukasaun (ME) liu husi Diresaun Nasional Ensinu Sekundáriu Jeral, la aseita ba sidadaun neebe mak atu loke tan klase paralelu iha teritoriu laran.
Asuntu nee hatoo husi Diretor Nasional Ensinu Sekundariu iha ME, Benjamin Gomes da Cruz Fernandes ba STL iha salaun Ian Martin Balide, Sesta nee (12/06/2026).
“Tinan ida nee la eziste ona klase paralelu iha Timor laran, nee la eziste ona, nee duni klase paralelu nee ami la eziste tiha ona, eskola nee iha deit mak eskola filial individual, ho sentru nee duni laiha tan klase laralelu, neebe klase paralelu neebe mak taka ona nee taka ona, ami sei la aseita tan loke klase paralelu tuir ida-idak nian hakarak,” nia afirma.
Benjamin akresenta, klase paralelu barak mak Ministériu taka ona no labele loke fali, nee duni la eziste ona klase paralelu, laos ema ida-idak loke klase paralelu tuir ida-idak nian hakarak, nee labele.
Iha fatin seluk, Diretor Servisu Edukasaun Munisípiu Ainaro, Patricio da Costa Magno dehan, Servisu Edukasaun Munisipiu (SEM) Ainaro nafatin koko atu rezolve klase paralelu no daudaun iha klase paralelu hitu (7), ninia aprendizajen lao diak hanesan baibain.
“Klase paralelu ita koko atu rezolve, tanba sira nee turma deit, ita koko atu koloka ema atu hanorin iha neeba, tanba ita rezolve oituan, ami iha klase paralelu hitu, nee ativu hela, ninia prosesu ensinu aprendizajen nee lao hanesan bai-bain, klase paralelu nee ba ensinu baziku deit, ninia aprendizajen lao diak hanesan baibain,” nia haktuir.
Diretor SEM Ainaro nee dehan, atividades ensinu aprendizajen iha klase paralelu nee lao hanesan baibain, oinsa prezensa estudantes sira nian ba eskola, tanba klase paralelu nee oinsa estudantes sira bele eskola, nee duni nafatin koko rezolve klase paralelu neebe daudaun nee eziste hela iha Munisipiu Ainaro.
Nunee mos Diretor Servisu Edukasaun Munisípiu Likisa, Julio da Silva dehan, ba EB 2 maibe manorin nee eskola mak jere tanba manorin sira nia karga horariu la too mak halo klase no asesu alunu sira nian.
“Ninia prosesu aprendizajen mak mensiona leten nee, tanba manorin sira ho numeru klase neebe kiik, manorin sira nia karga la too no alunu sira lao ho distansia dook, prejudika alunu sira sempre ba eskola tarde, tanba nee mosu klase paralelu nee, tanba distansia neebe mak dook halo ita nian alunus sira sempre too tarde eskola,” nia dehan.
(jac)
