ME Loke Oportunidade Ba Profesor Kontratadu 2023 Halao Dialogu

Sekretariu Estadu Ensinu Sekundariu Jeral no Ensinu Sekundariu Tekniku Vikasional Timor-Leste (SEESJ, ESTVTL), Domingos Lopes Lemos. (Foto Espesial)

DILI, STLTIMORLESTE.com – Ministeriu Edukasaun (ME) loke oportunidade ba profesor kontratadu tinan 2023 nian atu halao dialogu, oinsa bele buka no hetan solusaun dignu ba problema no preokupasaun profesor sira nian.

“Ita loke ona dialogu hamutuk ho profesor kontratadu sira iha tinan kotuk, konsege buka solusaun too diskuti malu, nee hatudu katak Governu liu husi ME la taka dalan ba profesor sira, maibe nafatin loke dialogu hodi hetan solusaun ba profesor sira nian problema,” dehan Sekretariu Estadu Ensinu Sekundariu Jeral no Ensinu Sekundariu Tekniku Vikasional Timor Leste (SEESJ, ESTVTL), Domingos Lopes Lemos iha Salaun VIP Ministeriu Edukasaun (ME), Vila Verde, Dili, Kinta (16/01/2025).

Tuir nia, husi problema profesor kontratadu tinan 2023 nian, prosesu nee too Primeiru Ministeriu (PM) Kay Rala Xanana Gusmão no Ministeriu relevante sira seluk, nunee ohin loron loke oportunidade atu halo dialogu ho profesor kontratadu sira, oinsa buka dalan atu rezolve problema neebe sira enfrenta durante nee.

Tanba dever ida Governu liu husi ME nian mak loke oportunidade ba profesor kontratadu tinan 2023 nian atu halo dialogu, nafatin koalia asuntu ba preokupasaun profesor sira nian atu bele rezolve problema neebe iha.

Ministeriu Edukasaun konsidera ba sakrifisiu sira neebe durante nee profesores kontratadu 2023 sira kontribui iha tinan barak nia laran, tanba nee nafatin hanoin ba asuntu ida nee atu bele buka solusaun hamutuk, hodi rezolve problema profesor, hodi kualifika liutan setor edukasaun iha Timor Leste.

Iha sorin seluk, Porta Voz Profesor kontratadu tinan 2023 nian, Agustinho Pinto afirma, ohin profesor kontratadu tinan 2023 nian hetan oportunidade halo dialogu ho ME, atu fo hanoin ba malu liu husi dialogu sira, oinsa bele hamutuk hodi rezolve problema profesor kontratadu 2023 nian.

Tanba nee, husu ba Governu atu halo desizaun diak no Sekretariu Estadu mos ohin dehan prosesu ba dialogu sei kontinua nafatin atu hetan desizaun neebe dignu ba profesor kontratadu tinan 2023 nian hotu.

Aleinde nee mos profesor kontratadu tinan 2023 nian, Eufrajia dos Santos Ximenes dehan, desizaun neebe ohin mosu husi dialogu, katak loke teste espesial ba profesor kontaratadu tinan 2023 nian apresia, maibe husu atu desizaun sira nee tenke bazeia ba lei estatu funsaun publiku nian.

(ter)

Share it :

Leave a Reply

Your email address will not be published. Required fields are marked *