DILI, STLTIMORLESTE.com – Relasiona ho problema profesor kontratadu tinan 2023 nian neebe durante nee ezije sira nia direitu, Governu liu husi Ministeriu Edukasaun (ME) kontinua loke teste espesifiku ida ba profesor kontratadu sira, nunee bele aplika tuir dalan legal.
Informasaun sira nee hatoo husi Sekretariu Estadu Ensinu Sekundariu Jeral no Ensinu Sekundariu Tekniku Vikasional Timor Leste (SEESJ, ESTVTL), Domingos Lopes Lemos liu husi nia diskursu, hafoin halo dialogu ho profesor kontratadu tinan 2023 nian, iha Ministeriu Edukasaun (ME), Vila Verde, Dili, Kinta (16/01/2025).
“Ita sai profesor laos fasil, tanba liu husi rekejitus oin-oin, nunee Governu mai ho planu atu loke teste espesial ba profesor kontaratadu 2023 nian, atu idak-idak bele aplika no tuir teste husi kriteria neebe ministeriu relevante fo sai ba publiku,” hatete Domingos.
Maibe nia dehan, planu neebe mak ME uza hodi fo nafatin teste espesial ba profesor kontratadu tinan 2023 nian, atu hatudu kriteria neebe tuir dalan lo-loos, hodi labale hamosu manipulasaun ba lei tantu ba rekejitus ruma.
Tanba nee, fiar nafatin ba profesor kontratadu sira, atu iha espiritu vontade nafatin hodi aplika ba teste neebe iha, no ema neebe iha interese sai profesor, minimu grau Bachareladu, Lisensiadu, Mestradu ka Doutoradu.
Nunee mos Asesor Juridiku husi Ministeriu Edukasaun (ME), Filipe Rodrigues dehan, proseu loke bolsa kandidatura ba profesor kontratadu nee, hanesan programa kontinuasaun, tanba nee ME sei loke teste espesial ba eis profesor kontratadu 2023 nian, Governu mai ho planu ida, atu loke teste espesifiku ba profesor kontratadu tinan 2023 nian, hodi bele aplika tuir kriteria neebe iha, maibe prosesu sira nee fazeadamente sei iha planu nia laran, tanba nee ME sei buka no loke dialogu sira, atu buka solusaun neebe dignu.
Entretantu Porta Voz ba Profesor kontratadu tinan 2023 nian, Agustinho Pinto dehan, proposta foun ida neebe ME anunsia, katak atu loke teste espesial ba profesor kontaratadu 2023 nian, maibe ami nia aspirasaun laos atu partisipa teste refere.
Tanba nee husu ba Governu liu-liu ME atu loke kriteria tenke bazeia nafatin ba lei estatutu funsaun publiku nian, husu atu labele halai sees husi lei nee rasik, karik lei nee mak funsiona hanesan profesor kontaratadu 2023 nian, prontu koopera, hodi solusaun sira bele lao tuir nia dalan.
(EST 1)