DILI, STLTIMORLESTE.com – Ministeriu Edukasaun (ME) liu husi inspetor no inspetora sira iha Edukasaun Munisipiu Dili, halao monitoring ba ezame segundu periodu ba eskola neebe lokaliza iha Dili.
Superintendente Edukasaun Munisípiu Dili, Cesarina C. Guterres ba STL, Segunda nee (13/07/2026) hatete, ohin hanesan loron dahuluk neebe estudantes sira sei partisipa iha ezame segundu periodu nian iha sira nian eskola idak-idak, oinsa mak eskola sira bele halao ezame ida nee lao ho diak no susesu.
“Ohin ita nian inspetor no inspetora sira halo monitoring ba ita nian atividades ezame segundu periodu nian, tanba klaru nee inspetor no inspetora sira sei tun ba ita nian eskola EBC publika, privadu, katolika no ESTV, ESG sira hodi halo observasaun direita ba ita nian estudantes hirak neebe mak partisipa iha ezame ba ohin loron dahuluk ninia, ita sei halo mnitoring ba eskola hotu,” nia esplika.
Nia argumenta, inspetor eskolar sira hahu ohin halo monitoring ba nivel eskola neebe ohin mensiona, nee sira halo monitoring too ezame remata, tanba sei haree ezame segundu periodu nee lao oinsa, tanba nee loron primeiru nee inspetor sira halo monitoring ezame ba iha nivel eskola ida-idak.
Iha fatin seluk, Kordenador EBF Fatumeta, Jose Manuel Guterres dehan, sira nian estudantes sira sei partisipa deit iha avaliasaun, sira la iha ezame, nee duni daudaun nee sira nian atividades prosesu ensinu aprendizajen lao hanesan baibain hodi hein estudantes sira tuir avaliasaun neebe mak iha.
“Ami nian estudantes sira sei partisipa deit iha avaliasaun, sira la iha ezame, nee duni daudaun nee sira nian atividades prosesu ensinu aprendizajen lao hanesan baibain, hodi hein estudantes sira tuir avaliasaun neebe mak iha. Ami nian profesores kada loron ativu hodi halao aprendizajen ba ami nian estudantes sira, estudantes sira nee maioria labarik kiik deit, dader sira mai iha eskola hodi tama aula,” nia informa.
(jac)
