DILI, STLTIMORLESTE.com – Ministeriu Edukasaun (ME) orienta ona tekniku sira tun ba sukat rai iha Munisipiu Ainaro, hodi bele harii rezidensia ba profesores sira.
Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Kuarta nee (05/08/2026).
“Ita agora planu tiha ona, Ministeriu Edukasaun atu prepara rezidensia ba sira, nee duni ita nian tekniku sira nee hetan orientasaun husi ministeriu, no ba sukat hela rai ona, hodi bele foti dokumentus konaba rai nian para bele halo rezidensia ba ita nian profesores sira, maibe ida nee ba tinan 2027 ninia, tuir ministeriu nian planu nee atu halo ida nee, nunee mak ita nian tekniku sira halo ida nee, tanba nee tekniku sira lao hela para bele sukat rai sira neebe mak estadu nian nee mak ita atu halo iha nee ba,” nia dehan.
Nia dehan, nee duni tekniku husi Ministeriu nian lao no sukat hela ona rai neebe mak atu halo rezidensia ba profesor sira, tanba sukat rai dezde iha semana rua hanesan nee ona, maibe se karik eskola neebe mak rai laiha, nee labele halo rezidensia ba profesor sira nomos bele halo iha fatin seluk.
‘Ita nian bolsa kandidatu profesores barak mak sei aluga ema nia uma, tanba sira seidauk iha rezidensia ba ita nian profesor sira, Diretor Servisu Edukasaun Munisípiu Likisa, Julio da Silva dehan, fasilidade hanesan meza no kadeira too ohin loron sei menus hela,” nia esplika.
Nia dehan, durante nee profesores sira nee balun aluga deit uma no balun komunidade mak fo fatin ba sira hodi hela, tanba sira seidauk iha rezidensia, no daudaun nee ME iha ona planu hodi tekniku sira tun mai sukat ona rai, neebe mak atu halo rezidensia ba profesores sira neebe seidauk iha fatin.
“Hau sente durante nee profesores sira nee balun aluga deit uma no balun komunidade mak fo fatin ba sira hodi hela, tanba sira seidauk iha rezidensia, no daudaun nee ME iha ona planu hodi tekniku sira tun mai sukat ona rai neebe mak atu halo rezidensia ba profesores sira neebe seidauk iha fatin,” nia informa.
Entretantu Diretor Servisu Edukasaun Munisípiu Bobonaro, Miguel Freitas hatete, profesores maioria mak aluga uma, maibe sira 200 resin mak aluga uma, kada fulan selu US$ 50 hatoo ona ba ME nasional, maibe seidauk fo resposta, profesores 200 resin nee husi nivel pre eskolar, ensinu baziku, sekundariu no tekniku vokasional.
“Kona-ba sira nian hela fatin nee prontu, provizoriu sira sei aluga komunidade sira nian uma, kada fulan sira selu kos US$ 50, tanba sira aluga uma, maibe ida nee difikuldade boot. Hau aprezenta ona ba iha ministériu, atu nunee bele tau konsiderasaun ba sira, tanba sira dala ruma hela fatin nee hamutuk ho komunidade,” katak nia.
(jac)
