DILI, STLTIMORLESTE.com – Ministeriu Edukasaun (ME) abertura seminariu ba selebrasaun loron mundial lian inan 2025, ho tema “Edukasaun Multilinge ba Futuru ida Neebe Dignu no Sustentavel iha Timor Leste”.
Seminariu ba selebrasaun loron mundial lian inan 2025 nee halao iha salaun Ian Martin, Balide, Segunda nee.
“Tinan ida nee ita halo seminariu ida loron internasional lingua materna neebe mak tuir lo-loos nee monu iha loron 21 Fevereiru, hanesan ohin hau dehan katak, UNESCO komemora loron ida nee iha momentu neeba estudantes joven sira Banlades luta ba sira nian lian materna, sira mos hetan torturasaun, balu mate, entaun UNESCO foti loron ida nee sai hanesan loron importante ida, tanba nee mak ita selebra iha loron 21 Fevereiru, entaun tinan ida nee ita halo selebrasaun iha RAEOA, tinan ida nee ita mos habelar liu tan programa lian materna iha eskola sira RAEOA,” haktuir Ministra Edukasaun (ME), Dulce de Jesus Soares ba jornalista sira iha salaun Ian Martin Segunda nee (17/02/2025).
ME Dulce dehan, lian materna nee hanesan ponte ida hodi ajuda, tanba la hanorin lian materna nee iha eskola hotu-hotu, maibe haree ba iha area neebe mak estudante sira nian inan aman, persentajen lian tetum ho portugues nee menus tebes, iha edukasaun laos aprende lingua, maibe aprende mos kontiudu husi labarik neebe mak aprende diak liu tan ninia kontiudu nee ho diak liu tan.
“Lian materna ho tetum nee laos uza alfabetu neebe mak la hanesan, uza abcd hanesan hotu, se aprende A ho lian materna ba iha tetum mos hanesan deit A, para hafasil liu tan estudantes sira iha prosesu aprendizajen,” nia esplika.
Nunee mos Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural Habitasaun Komunitaria, Mariano Assanami Sabino hatete, ohin selebra loron mundial lian materna, nunee importante tebes-tebes, parabens ba Minista no parabens ba ME, profesores sira neebe mak hahu ona para haree lian materna iha fatin-fatin, tanba reforsa liu tan estudante sira identidade, no sira orgulhu ho sira nian lian no aprende lian tetum, portugues no lian sira seluk, maibe sira orgulhu uluk ho sira nian lian.
(jac)
