DILI, STLTIMORLESTE.com – Visi Prezidente Partidu Libertasaun Popular, Asuntu Orgaun Asosiadu no Movimentu (PLP), Amilcar dos Reis Araujo “Hatenu” kestiona no fo kritika makaas ba orden no medida neebe foti husi Prezidente Autoridade (PAM) Same (Manufahi) nian. PAM Same foin lalais nee foti desizaun hodi oho hotu karau povu nian ho razaun atu implementa ordem ijiene publiku no hamoos sidade.
Tuir deklarasaun neebe fo sai husi Amilcar, nia haree katak medida nee haterus fali povu kiik sira neebe depende ba animal sira nee hodi moris, selae autoridade sira rasik seidauk konsege rezolve problema hanesan iha sidade kapital.
“Iha sidade Dili deit seidauk bele rezolve, mais iha Same karau povu nian PAM implementa ordem hijene publiku, oho hotu,” dehan Amilcar ho hirus ba STL, iha nia rezidensia Manleuana, Dili, Kuarta (01/07/2026).
Amilcar mos kestiona mehi PAM Same (Manufahi) nian neebe hakarak muda Same sai sidade moos no moderu, maibe uza fali forsa no oho fali povu nia riku soin. Nia dehan ho dalan hanesan nee, Same sei la konsege ultrapasa progresu neebe iha Munisioiu Oecusse (RAEOA).
Politiku PLP nee kompara situasaun nee ho sidade Dili, neebe nuudar sidade boot tebes mos labele rezolve kestaun animal neebe lao lemo lemo, too iha fatin balu animal sulan hamutuk fali ho servisu fatin Estadu nian.
“PAM atu muda sidade moos sei laliu Munisioiu Oecusse, tanba Dili deit karau sulan hanutuk ho Funsionariu DNTT ” nia sublina hodi koalia konaba situasaun iha area Hera.
Konaba kestaun nee Akademista UNPAZ, Eduardo Soares fo hanoin katak, implementasaun ordem Munisipal labele hanehan fali direitu ekonomiku komunidade nian. Nia sujete ba Autoridade Munisipal atu labele foti kedas medida radikal hanesan oho animal, maibe tenke kria fali fatin kuarentena ka luhan regulamentadu no fo koima neebe lojiku hodi hanorin povu, nunee sidade bele moos maibe mos labele hamate povu kiik sira nia moris.
Entretantu komunidade Same (Manufahi), Belarmino de Oliveira espresa ninia sentimentu teiste hasoru desizaun Autoridade Munisipal nian kedas medida oho animal. Nia dehan karau sira nee nuudar baze ba moris no fonte prinsipal hodi sustenta ekonomia familia, inklui selu oan sira nia eskola, nunee husu ba Governu atu haree fali desizaun nee ho diak hodi labele kria fali kiak foun ba povu.
(car)
