DILI, STLTIMORLESTE.com – Too agora menu ba implementasaun programa merenda eskolar seidauk iha mudansa, no sei uza nafatin menu tuan neebe antes nee implementa ona.
Lia hirak nee haktuir husi Koordenador Pre Eskolar Sagrada Familia Vila Verde, Cornelio Antonio Soares ba STL iha nia knaar fatin Vila Verde, Kuarta (05/02/2025).
“Merenda eskolar nee foin hahu iha dia 3 Fevereiru tinan nee, no menu nee rasik sei nafatin uza menu tuan ka seidauk iha mudansa ba menu merenda eskolar. Ami tuir deit dadus neebé bazeia ba matrikula. Agora estudante hamutuk 168 mak asesu ba iha programa merenda eskolar,” nia afirma.
Nia dehan, ema nain ida mak tein ba estudantes sira han, dader estudantes sira han tuku 09:30, menu nee dala ruma estudantes sira han sasoro, tau ho naan ka modo tahan, senora, nunee mos estudantes sira han ho aifuan hanesan apel no hudi.
Iha parte seluk, Fernando Soares hanesan Diretor Nasional Edukasaun Inkluzivu Asaun Sosial Eskolar hatete, dala ruma implementa mak la tuir menu neebe mak iha, maibe eskola ninia kondisaun la hanesan, liu-liu ai-haan produtu neebe mak la hanesan, entaun muda menu tuir kondisaun eskola idak-idak, menu nee iha ona, dala ruma ba kompra iha merkadu, ezemplu iha nee ba naan laiha, entaun troka fali menu nee.
(jac)