DILI, STLTIMORLESTE.com – Oras nee daudaun ekipamentus pratika nian ba estudantes sira iha ensinu sekundariu tekniku vokasional sufisiente, maibe karik tekvo balun neebe sei menus ekipamentus, husu sira tenke halo proposta mai Ministeriu Edukasaun.
Liafuan nee hatoo husi Superintendente Edukasaun Munisípiu Dili, Cesarina C. Guterres ba STL iha nia knaar fatin, Segunda nee (06/07/2026).
“Relasiona ba ekipamentus meja kadeira sufisiente eskola sira no Tec.Voc mos kadeira meja sira Sufisiente hotu. Ekipamentus neebe iha hanesan komputer sira too oras eskola sira la ezije, signifika katak laos kompletu maibe too hela hodi fasilita estudante sira nia atividade pratika nia Tec.Voc, tanba ita nian sira mos hetan tulun husi KOIKA. Baibain eskola sira ezije no husu mak kadeira meja sira mai hodi transmite ba nasional, ita nian tekvo iha Dili Publiku Tec.Voc hamutuk 4,” nia deklara.
Tuir nian, klaru kuandu komputer mak eskola tekvo 28 Novembru Becora sei menus mos eskola tenki halo proposta ba ME, tanba durante nee sira nia pedidu la tama. Iha tekvo 28 Novembru komputador mak sei menus no EHT makina suku roupa mak menus no projetor mos menus,” tenik inspector eskolar.
Iha fatin seluk, Diretor Eskola ESTV-IT 28 de Novembro Becora-Díli, Tomas Pinto dehan, kona-ba sira nian meza no kadeira iha sira nian eskola, daudaun nee sufisiente hela ba estudantes sira, no sira presiza atu aumenta deit komputador ba estudantes sira hodi bele halo pratika.
“Ami nia meja no kadeira ba estudante sira sufisiente, maibe ba profesores sira mak laiha no konaba ekipamentus ami nia komputadores no meja komputadores mak menus no ami persiza tebes komputadores ba estudante sira husi departmentu 4 nee hotu, tanba ami nian estudantes hirak nee laos simu deit teoria, maibe sira mos halo pratika, nunee mak ami husu nafatin apoiu ekipamentus pratika nian ba ami nian estudantes sira,” nia dehan.
Tomas akresenta, estudantes sira husi tekvo nee laos simu deit teoria, maibe sira husi departamentu haat nee, bainhira sira teoria nee sira halo mos pratika, tanba nee presiza iha ekipamentus neebe mak kompletu ba estudantes sira, tanba too agora sira nian eskola ekipamentus pratika nian sei menus.
(jac)
