BAUCAU, STLTIMORLESTE.com – Merkadu sai dezafiu ba Sentru Dezenvolvimentu Aldeia (CDA) sira ne’ebé hetan apoiu orsamentu husi Governu atu dezenvolve atividade hakiak karau no fahi iha Munisípiu Baucau.
Koordenador CDA hakiak karau, Rogério Soares, hato’o apresiasaun ba Ministériu Dezenvimentu Rural Habitasaun Komunitáriu, tanba nia inisiativa atu apoia fundus ba CDA sira iha área hakiak karau, fahi, manu broiler, manu lokal, kuda modo no kalpintaria.
Iha Munisípiu Baucau, total CDA hamutuk 52, no kada CDA hetan orsamentu hamutuk US$ 14.800 atu halao atividade ne’ebé sira determina ona.
Rogério hateten, parte CDA sira simu ona orsamentu no hahú preparasaun fatin ba hakiak animal. Iha CDA hakiak karau, sira atualizasaun ona atividade hakiak, inklui hakiak karau vaka 12 iha Suku Abo, Postu Administrativu Matebian, maibé problema boot mak seidauk iha merkadu ne’ebé bele simu no fa’an produtu sira.
“Hau hakarak koalia ba Ministériu oinsá halo karta asegurasaun ida ba ami nia CDA atu lori ba kompaña ka lori ba merkadu ida ne’ebé loos. Tanba manu broiler nian iha kompaña atu sosa, maibé ba karau no fahi, ha’u seidauk rona iha kompaña atu foti. Nia dalan iha ne’ebé karik ami seidauk hatene,” Rogério Soares hateten ba jornalista sira iha Triloca, Baucau, Kinta (27/08/2026).
Nia konsidera apoiu orsamentu ne’e nu’udar meius ida atu tulun komunidade sira aumenta rendimentu no sustenta ekonomia família, liuliu atu hamenus dependénsia ba buka servisu iha rai liur.
Rogério mos konsidera apoiu Governu ne’e importante tanba bele tulun jovem sira iha baze atu hetan atividade ekonomia no la presiza sai ba rai liur atu buka servisu.
Tanba ne’e, nia husu Ministériu atu kria no fasilita merkadu ba produtu karau no fahi, nune’e hakiak-na’in sira ne’ebé hetan apoiu husi Governu bele hetan rendimentu husi atividade ne’ebé sira halao.
“Ita fa’an ona lima, maibé ne’e ba merkadu matadour sira mai no sosa. Maibé ita hakarak lori kedas 12 ekor iha dala ida, merkadu laiha. Entaun, ita husu atu estabelese merkadu ida,” Rogério rekomenda.
Iha parte seluk, Koordenador Programa Revitalizasaun Komunitáriu husi Ministériu Dezenvimentu Rural Habitasaun Komunitáriu, Amaro Ximenes, hateten katak Governu hatene kona-ba dezafiu merkadu ne’ebé hasoru CDA sira, inklui produtu karau, fahi no ortikultura.
Amaro hateten, Ministériu planeia iha tinan 2026 atu harii loja ida iha Munisípiu Baucau atu sai fatin konsentrasaun ba produtu sira husi CDA no fa’an diretamente ba konsumidór sira.
“Ita koordena fatin iha ona. Agora ita hein hela orsamentu atu harii loja ne’e. Bainhira loja ne’e harii ona, produtu sira husi kada CDA, naan manu, karau, fahi, produtu ortikultura sira inklui ikan, ita sei fa’an iha ne’ebá,” Amaro Ximenes hateten.
Planu ida-ne’e espera bele ajuda responde ba problema merkadu ne’ebé CDA sira enfrenta, nune’e atividade produtiva iha nivel aldeia bele kontinua no komunidade sira bele hetan benefísiu ekonomia husi apoiu Governu.
(tom)
