DILI, STLTIMORLESTE.com – Formador husi Ministeriu Ensinu Superior Siensia no Kultura (MESSK) nafatin fo formasaun lingua português ba dosentes sira husi ensinu superior.
“Formasaun kursu lian português ba Dosente sira lao nafatin, ami nian formador husi ministeriu hamutuk nain 5, maibe dosentes kada universidade nomea mai nee, dosentes tuir sira nia proposta bele liu ema nain 2,” dehan Diretor Jeral Ensino Superior no Siensia, Domingos Barros ba jornalista STL, Kuarta nee (12/08/2026).
Nia dehan, konaba durasaun ba formasaun lian português ba dosente sira nee, balun fulan ida ou fulan rua, nee tuir sira idak-idak nian nivel, sira tuir formasaun iha nivel baziku too intermediu.
Parte seluk, Reitor ICS, Leao Borges hatete, Dosentes husi Instituto Ciência Saúde (ICS) durante nee partisipa iha formasaun lian português husi Ministériu Ensinu Superior Siensia no Kultura (MESSK).
“Durante nee ami nian dosentes sira tuir hela formasaun lian português, atu nunee bele aumenta sira nian konhesimentu ba lingua português, tanba formasaun nee rasik husi MESSK mak fo mai ita nian dosente sira atu nunee sira bele aprende diak lingua refere, tanba lian português nee hanesan lian ofisial,” nia informa.
Reitor ICS dehan, kona-ba dadus dosentes nain hira mak partisipa iha formasaun, nia parte ladun iha konhesimentu. Maibe sira nian dosentes lisensiatura barak liu mak partisipa iha formasaun.
“Formasaun lian português nee importante tebes para ita nian dosente sira nee bele aprende lian refere, tanba português hanesan ita nian lian ofisial, oinsa mak ita promove nafatin lian ida nee,” nia informa.
(jac)
