LISBOA, STLTIMORLESTE.com – Fernando Alexandre, Ministru Edukasaun, Siénsia no Inovasaun Portugal, governu atual sorumutu ho Ministra Edukasaun Timor Leste, Dra. Dulce de Jesus Soares, Segunda feira ne’e iha Lisboa.
Ministra Eduksaun (ME), Dulce de Jesus Soares hatete, pontu prinsipál sira husi enkontru nee mak hanesan agradese Projetu CAFE, hatoo agradesimentu ba Governu Portugal ba apoiu Projetu CAFE – Centros de Aprendizagem e formasaun eskolar, neebe implementa ho susesu iha munisípiu 14 hotu iha Timor Leste.
Nia afirma, proposta profesores foun, Timor Leste propoin atu simu profesór português hamutuk 150 ba tinan letivu 2027, hodi reforsa ensinu lian português no disiplina sira seluk iha eskola sira. Diploma Ministerial CAFE, parte rua diskute no klarifika diploma Ministerial CAFE nian neebe regula funsionamentu internu sentru sira nee iha kontestu sistema edukativu Timor Leste ninian. Formasaun ba dosente, koalia mos konaba planu formasaun kontinuasaun ba profesor Timor oan sira, ho apoiu tekniku no pedagójiku husi Portugal.
Lei baze edukasaun foun, Ministra reafirma kompromisu Timor Leste nian ba promosaun lian português nuudar lian ofisial, hafoin resente aprovasaun Lei Baze Edukasaun foun. Kooperasaun CPLP destaka importansia selebrasaun loron Mundiál Lian Português no relembra Reuniaun Ministrus Edukasaun CPLP neebe foin akontese iha Díli, hodi hametin ligasaun entre nasaun membru sira.
Enkontru nee konfirma relasaun forte entre Timor Leste ho Portugal iha setor edukasaun, no hatudu vontade husi governu Portugal no Timor Leste atu kontinua hametin kooperasaun ba kualidade ensinu no valorizasaun lian português.
(jac)
