DILI, STLTIMORLESTE.com – Kompanhia nain ba aviaun neebe mak charter husi parte Ministériu Negósiu Estranjeiru no Kooperasaun (MNEK) nian, Autoridade Aviasaun Sivíl Timor Leste (AACT) fo ona deklarasaun ba Polísia Nasional Timor Leste (PNTL) konaba jet privadu ho tipu Cesna Citatyion 700 Longitude (C700).
Portavos PNTL, Superintendente Xefe Polísia João Belo dos Reis dehan, MNEK ho AACTL inklui Ajensia CEVA Logistics, presta ona deklarasaun iha Diresaun Servisu Investigasaun Kriminál (DSIK) relativamente ho polemika aterrazen jet privadu ho tipu Cesna Citatyion 700 Longitude (C700) iha Aeroportu Internasional Nicolau Lobato, Comoro, Kuarta, 01 Julhu tinan 2026.
“Hau seidauk koalia ho investigador, semana kotuk hau verifika ba sira dehan, prosesu lao hela no Tersa (14/07) hau bele komunika ba maluk sira konaba asuntu ida-nee,” hatete Portavos Komando PNTL, Superintendente Xefe Polísia João Belo dos Reis ba jornalista sira iha nia knaar fatin Komando Jeral PNTL, Caicoli, Tersa (14/07/2026).
Nia deklara, Kompanhia nain ba aviaun nee, sira neebe mak charter no sira husi parte MNEK nian, AACTL fo ona sira nia deklarasaun ba polísia.
“Hein ami hetan informasaun sufisiente, ami bele aprezenta ba iha Ministeriu Publiku (MP),” nia informa.
Iha fatin ketak, Akademista UNTL, Julio da Costa Pinto informa, PNTL liu husi DSIK tenke servisu makaas hodi halo investigasaun klean ba Jet Privadu neebe mai Timor Leste uza Presidente Republika nia naran.
“Ita haree rona deklarasaun husu Prezidente Republika Jose Ramos Horta dehan, la hatene Jet Privadu nee no pasajeirus nain hira nee atu mai vitita PR, kazu nee polísia tenke esforsu hodi investigasaun klean ba Jet Privadu nee, labele husik deit hanesan nee, sei husik deit ita nia rain ema bele tama livre laiha konhesimentu husi Governu no imigrasaun,” nia afirma.
(jen)
