DILI, STLTIMORLESTE.com – Motorista Transporte Publiku iha kapital Dili no Munisipiu sira dadaun nee hasoru difikuldade makas tanba folin mina rai, Gazoel ho Gazolina neebe sae makas iha semana hirak ikus nee. Sira senti katak folin mina neebe aumenta kada loron la tuir ho rendimentu neebe sira hetan husi pasajeiru, hodi fo todan ba sira nia moris loron loron.
“Ami sosa mina karun, maibe tarifa nafatin hanesan. Osan neebe ami hetan husi pasajeiru agora la kobre tan kustu mina, seidauk konta tan ho manutensaun kareta nian,”hatete Motorista Mikrokroket ida ho naran Jacarias da Costa, neebe halao operasaun iha rotas sentral Dili, ba STL, Segunda (27/04/2026).
Motorista nee mos kestiona hela oinsa kontratu milhaun US$ 186 resin ho kompanhia ETO neebe Governu asina seidauk konsege estabiliza folin mina iha eatasaun sira. Preokupasaun nee hamosu duvida boot kona-ba kualidade stok no distribuisaun mina neebe sira sente la too ba kbiit laek sira.
Iha parte ketak Observador Ekonomia, Mario da Silva alerta katak, situasun nee hanesan indikador ida ba risku inflasaun neebe bele hamenus poder kompra komunidade nian no afeta estabilidade ekonomika nasional.
Tuir ekonomista nee mina ka kombustivel mak input prinsipal iha sistema distribuisaun. Bainhira folin mina sae, neebe ikus mai refleta ba folin bazika iha merkadu.
“Amu husu ba Ministeriu relevante atu halao fiskalizasaun hodi prevee pratika espekulasaun presu, no garante katak mina neebe ho folin subvensionadu too duni ba populasaun, laos deit hela iha nivel intermediariu,” hatete Mario.
(car)
