BAUKAU, STLTIMORLESTE.com – Ministeriu Publiku (MP) Baukau alega pena multa ba tripulante nain 32 ho ró husi Indonezia neebe halao peskas ilegal iha tasi Timor.
Iha loron 27 Abril nee, Tribunal Judisial Primeira Instansia Baukau kontinua realiza julgamentu ba kazu peskas ilegal iha tasi Timor neebe involve husi tripulante nain 32 husi nasaun Indonezia.
Advogadu Privadu, José Pedro Camões aprezenta, tuir loloos iha julgamentu refere atu aprezenta leitura deside ba arguido nain 32 nee, maibe iha julgamentu nee seidauk iha desizaun, tanba iha dokumentus balu neebe prezisa halao tradusaun no sei aprezenta hikas ba Ministeriu Publiku.
Maibe durante iha prosesu julgamentu nee, Ministeriu Publiku alega arguidu sira atu multa.
“Ita atu dehan Ministeriu Publiku nee reprezenta estadu asuntu penal ohin hau haree pedidu nee todan tebe-tebes, tanba nia husu US$ 120.00 ba ema ida loron 100, seluk nee mos besik US$ 4 mill hotu, depois husu tan multa ida ba empreza entaun pedidu nee besik US$ 50 mill,” hateten Advogadu Privadu, José Pedro Camões ba jornalista sira iha resintu Tribunal Judisial Primeira Instansia Baukau hafoin remata julgamentu, Segunda (27/04/2026).
Julgamentu refere tuir planu sei kontinua hikas iha loron 01 Maiu 2026 hodi hetan dezisaun final.
Entretantu julgamentu nee, prezide husi Juíza singular Maria Modesta Viera, reprezentante Ministeriu Publiku, Ambrósio Rangel Freitas no arguido nain 32 nee hetan defeza husi Advogadu Privadu, José Pedro Camões akompanha husi reprezentante Embaixador Indonezia iha Timor Leste.
(tom)
