MPIE Fo Prioridade Ba Konstrusaun Estrada, Saude & Edukasaun Iha TL

Ministru Planeamentu no Investimentu Estratéjiku (MPIE), Gastão Fransisco de Sousa. (Foto: STL/EST 2)

DILI, STLTIMORLESTE.com – Ministru Planeamentu no Investimentu Estratéjiku (MPIE) fo prioridade ba konstrusaun sira iha Timor Leste (TL), liu-liu estrada, edukasaun no saude, tanba area relevante sira nee sai importante ba ema hotu nia nesesidade iha sosiedade.

“Ita nia planu no projetu neebe Governu fo prioridade liu ba area kosta sul nian, hanesan kondisaun estrada, setor saude, edukasaun no seguransa, oinsa setor relevante sira nee bele sai dezenvolvidu liu tan iha territoriu nasional, tanba nee fiar katak planu sira nee bele aselera ho diak,” dehan Ministru Planeamentu no Investimentu Estratéjiku (MPIE), Gastão Fransisco de Sousa ba jornalista sira iha Ministeriu Finansas (MF), Dili, Segunda (20/01/2025).

Tuir nia, Governu liu husi Primeiru Ministru (PM) Kay Rala Xanana Gusmão, hamutuk ho ministeriu hotu-hotu haree kona-ba ezekusaun orsamentu ba planu asaun projetu sira nian, liu-liu ba fundu kapital dezenvolvimentu no fundu dezenvolvimentu infraestrutura nian.

Tanba ezekusaun orsamentu iha tinan 2024 nian ho montante milhaun US$ 301, neebe haree ba kondisaun sira, liu-liu atu dezenvolve setor infraestrutura sira, tanba nee iha tinan 2025 atu haree fali ba planu seluk, oinsa bele halo dezenvolvimentu sustentavel iha rai laran.

Governu konsege ezekuta orsamentu 65% ba setor infraestrutura sira iha Timor Leste, tanba nee ohin Primeiru Ministru bolu Ministeriu hotu-hotu atu bele rona no haree katak, projetu balu ezekuta no balu la konsege ezekuta ho diak.

Maibe planu prioridade sira neebe Governu liu husi MPIE tau atensaun mak kondisaun estrada sira, setor saude, edukasaun no seguransa nian atu bele asegura sosiedade neebe saudavel.

Tanba planu asaun sira neebe iha tinan kotuk 2024 nian, projetu balu aselera no balu la konsege, nunee husu ba Ministru sira servisu ho diak, aselera projetu sira, liu-liu emprezariu sira neebe servisu dupla presiza haree, nunee kualifika setor infraestrutura iha Timor Leste ho dignu.

Aleinde nee, Ministeriu Obras Publika (MOP), Samuel Marçal dehan, Governu sempre mai ho planu atu haree no dezenvolve setor infraestrutura sira, liu-liu kondisaun estrada, pontes, bee moos no eletrisidade iha rai laran.

Kondisaun sira neebe Governu liu husi MOP fo prioridade mak kondisaun estrada nasional too munisipal sira, no setor relevante sira seluk tenke dezenvolve ho diak hodi fo nesesidade diak ba ema hotu.

(EST 1)

Share it :

Leave a Reply

Your email address will not be published. Required fields are marked *