DÍLI, STLTIMORLESTE.com – Munisípiu Aileu sei partisipa iha Festival Nasionál Desportu (FND) 2026 ho modalidade desportu hamutuk 15 no delegasaun ema nain 190, inklui atleta, komisaun organizadora no membru delegasaun.
Prezidente Federasaun Desportu Munisípiu Aileu, Domingos da Costa hateten katak, bazeia ba rezultadu preparasaun no enkontru ho federasaun desportu sira iha munisípiu, Aileu sei lori modalidade 15 hodi kompete iha FND 2026.
Nia hateten katak, komisaun organizadora FND fó oportunidade ba munisípiu hotu atu partisipa iha modalidade 19, maibé Munisípiu Aileu konsege prepara modalidade 15 de’it.
Modalidade 15 ne’ebé Aileu sei partisipa mak futebol feto no mane, voleibol feto no mane, basquetebol feto no mane, futsal feto no mane, atletizmu feto no mane, powerlifting feto no mane, atletizmu paralímpiku feto no mane, ténis meja feto no mane, inklui ténis meja paralímpiku, no jogu tradisionál hana kalik.
Domingos da Costa esplika katak, modalidade balun ne’ebé Aileu la partisipa mak natação, xadrez no modalidade hana, tanba limitasaun rekursu no kondisaun jeográfika, liuliu ba modalidade natação.
“Modalidade desportu ne’ebé Munisípiu Aileu la partisipa mak natação, xadrez no hana. Ita hotu hatene katak Munisípiu Aileu laiha tasi, nune’e modalidade natação Aileu sei la partisipa,” esplika Domingos da Costa ba jornalista STL, iha Ministériu Juventude, Desportu, Arte no Kultura, Díli, Segunda-feira (09/11).
Nia kontinua katak, delegasaun tomak husi Munisípiu Aileu hamutuk ema nain 190, ne’ebé kompostu husi atleta modalidade oioin, komisaun organizadora no membru delegasaun sira.
Kona-ba preparasaun, Domingos da Costa hateten katak Munisípiu Aileu hahú ona prosesu preparasaun liuhusi enkontru ho komisaun organizadora FND, ne’ebé koordena hosi Ministériu Juventude, Desportu, Arte no Kultura.
Nia mós konfirma katak, munisípiu aloka ona osan hamutuk US$5.000 hosi orsamentu Estadu atu suporta preparasaun atleta sira, inklui prosesu seleksaun ba atleta sira ne’ebé iha kualifikasaun atu reprezenta Munisípiu Aileu iha Festival Nasionál Desportu 2026.
Nia hein katak, partisipasaun Munisípiu Aileu iha modalidade desportu oioin, inklui jogu tradisionál hana kalik, bele promove identidade no kultura Timor-Leste ba munisípiu sira seluk no komunidade nasionál.
(leo)
