DILI, STLTIMORLESTE.com – Tribunal Judisial Primeira Instansia Dili (TJPID) julga arguidu ho inisial TS, hanesan Seguransa Diresaun Nasional Seguransa Patrimoniu Publiku (DNSPP).
Iha indisus sufisiente katak, arguidu servisu nuudar seguransa iha Tribunal Judisial Primeira Instansia Dili (TJPID) durante tempu naruk.
Iha loron Tersa 12 no iha loron 17 fulan Dezembru tinan 2023, entre tuku 21h17 to tuku 21h38, nia iha sala nº 54 TJPID.
Iha loron 03 fulan Outubru no iha fulan Dezembru tinan 2023, ofisial justisa ida konfirma katak, lakon sigaru barak ho marka Arrow, Surya no Joker, neebe rai hela iha sala nº 54, relasiona ho prosesu NUC 0052/19 (PCCIC), NUC 0023/22 (LIBZT), NUC 0092/23 (DIDIL), NUC: 0059/23 (PNSIC), NUC: 0009/23. LIMBR. Hamutuk pakote 156 (slof) mak lakon.
Sasin nee informa ba sekretaria, neebe kontaktu Polísia Investigasaun Kriminál atu halo investigasaun no haree kamera vijilansia iha fatin.
Hafoin halo analiza ba kamera vijilansia, haree katak arguidu tama ba sala nº 54 TJPID nian, uza janela nuudar fatin atu tama no sai hodi foti sigaru.
Konsekuensia husi arguidu nia hahalok hamosu prejuizu ba Estadu ho total neebe seidauk sura, no kria difikuldade no ameasa ba realizasaun justisa.
Arguidu komete naok iha Tribunal, ho sasan neebe naok hanesan objetu apreendidus iha prosesu neebe lao hela iha Tribunal, neebe agrava situasaun, tanba viola seguransa no konfiansa ba sistema judisiariu.
Arguidu halo ho konxiensia, hatene katak nia konduta bandu no bele hetan kastigu penal, no tan nee bele hetan sensura.
Bazeia ba buat neebe temi iha leten, arguidu nia hahalok konfigura krime Furtu Agravadu, previstu iha artigu 252 husi Kodigu Penal.
Hatan ba akuzasaun nee arguidu deklara katak, faktus neebe iha loos hotu, arguidu rekonhese foti duni sigaru sira neebe iha.
Arguidu deklara, nia foti sigaru Surya slop 10, iha loron 17 fulan Dezembru iha tinan 2023, iha oras tuku 9 kalan. Momentu neeba arguidu atu ba loke ahi, no haree janela ida nakloke hela iha sigaru barak mak iha laran, ho ida nee mak arguidu tama husi janela neebe loke hela hodi foti sigaru.
Arguidu deklara, iha loron 3 fulan Outubru arguidu foti mos sigaru, maibe foti mak sigaru Surya, kona-ba foti slop hira arguidu la lembra ona, tanba raut tau ba iha plastik ida.
Arguidu esplika, sigaru neebe foti iha loron 3 fulan Outubru arguidu fan iha Merkadu Taibesi hetan osan US$ 150, no sigaru neebe foti iha loron 17 fulan Dezembru arguidu fan hetan osan US$ 100.
Arguidu afirma, osan sira neebe arguidu hetan sosa hahan ba sira han. No depois prosesu nee lao ba oin, arguidu fo fila ona osan 100 kona-ba sigaru slop 10 neebe fan, no sigaru neebe foti iha loron 3 osan 150 mak arguidu seidauk fo fila.
Arguidu deklara, momentu neeba hasoru situasaun ekonomia familia difisil oituan, tanba nee mak foti sigaru fan hodi sosa hahan. Arguidu arepende tebes ba nia hahalok nee, promete sei la halo tan hahalok nee iha futuru.
Rona tiha deklarasaun arguidu, Tribunal husu atu tama ba iha faze alegasaun.
Iha alegasaun Prokurador Pedro Baptista deklara, arguidu konfesa imparsial ba faktus neebe iha. Tanba nee husu Tribunal atu aplika pena suspensaun ba arguidu.
Enkuantu husi parte defeza nian, Defensor Publiku estajiadu husu Tribunal tetu deklarasaun sira hotu, hodi aplika pena neebe justu no adekuadu ba arguidu.
Rona tiha alegasaun, Tribunal adia ba loron seluk hodi tama ba iha faze desizaun.
Audensia julgamentu nee prezide husi Juiz Koletivu, Jose Escurial, Fransisca Cabral, Juiz estajiadu nain ida, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Jenini Daos.
(ter)
